VERSEKERINGS LYSIE

Hierdie vier versekerings kategorieë behoort nagegaan te word voor jou vakansiereis begin.

HUISHOUDELIKE EN HUISVERSEKERING

Sorg dat dié polisse in plek is. Let op watter toebehore soos geisers, mure en swembadpompe gedek is. Dis raadsaam om ’n lys van sleutelitems (met serienommers) in die huis te maak en dit op hul plek af te neem. Dit moet aan die versekeringsmaatskappy verskaf word en sal nuttig wees wanneer jy in die geval van ’n inbraak eis. As jy huisoppassers gebruik, sorg dat hulle weet wie om in ’n noodgeval te kontak, byvoorbeeld ’n loodgieter of elektrisiën wat deur jou versekering goedgekeur is.

REISVERSEKERING

Niks kan erger wees as om ’n vakansie te moet kortknip weens ’n kansellasie wat verhoed dat jy kan reis nie. Verseker dat jy voldoende gedek is. Praat ook met jou mediese fonds oor dekking as jy beplan om oorsee te reis. As dit nodig is, koop bykomende gesondheid s versekering sodat behandeling en selfs mediese ontruiming gewaarborg is. Bewaar die nommers van krediet- en debietkaarte en reisigerstjeks op ’n veilige plek sodat dit vervang kan word as die kaarte verloor of gesteel word. Reël versekering vir dienste wat jy sal nodig kry as items verlore raak.

VOERTUIG VERSEKERING

Sorg dat jy vir onklaarheid, verblyfuitgawes, padbystand en noodmotorhuur gedek is. Indien nodig, gradeer jou dekking op. As julle met ’n sleepwa reis, sorg dat dit verseker is. As jy ’n grens na ’n buurland wil oorsteek, bevestig dat jy aan die volgende vereistes voldoen: ’n Brief van jou versekeringsmaatskappy wat meld dat die voertuig vir oorgrensreis gedek is. ’n Magtigingsbrief van die finansiering s bank wat meld dat jou motor oor die grens bestuur mag word, want dit is die eiendom van die bank tot dit afbetaal is.

DEKKING VIR PERSOONLIKE BESITTINGS

Die meeste polisse dek die verlies van persoonlike besittings, byvoorbeeld juweliersware en brille. Verskaf ’n gedetailleerde lys van jou persoonlike items aan die versekeraar om te verhoed dat jy jou in ’n posisie bevind waar verliese die perk ver oorskry. Sporttoerusting wat saam op vakansie geneem word, behoort ook verseker te word. Die aard van die toerusting sal die vlak en soort dekking daarvan bepaal. Om te kontroleer dat jy behoorlik gedek is voor jy met vakansie gaan kan vir jou gemoedsrus gee en jou vakansie sorgeloser maak.