Kosblik-idees
Party kinders eet enigiets . . . terwyl ander weer vol fiemies kan wees
As jy daagliks vir jou kind ’ n kosblik met gesonde kos inpak skool toe, leer jy hulle nie net om reg te eet nie, jy help hulle ook om gefokus te bly en voorkom dat te hoë of te lae bloedsuiker hul gedrag in die klas nadelig beïnvloed. Dit moedig hulle ook aan om tydens pouses êrens te sit en eet voor hulle begin speel. Dit is baie belangrik, aangesien kinders geneig is om weggevoer te raak wanneer hulle speel en gevolglik nie tyd het om iets te eet nie. Dit kan veroorsaak dat hul bloedsuikervlakke daal wat tot moegheid en verswakte konsentrasie in die klas kan lei.
Probeer altyd om iets uit al die voedselgroepe in ’ n kosblik te pak – vrugte, groente, proteïen,
suiwel en stysel. Dit sal sorg vir ’ n gebalanseerde dieet en help om puntenerige eters bekend te stel aan die verskillende voedselgroepe. Onthou ook om altyd water in te pak. Die meeste skole laat kinders toe om ’ n waterbottel by hulle in die klas te hê, veral tydens die warm somermaande. Dit sal verseker dat hulle gehidreer bly.
Skooletes hoef nie duur te wees nie. Hier is ’n paar gesonde én goedkoop idees vir jou kind se kosblik:
Gebruik vleis wat oorgebly het van die vorige aandete om heerlike toebroodjies mee te maak. Is daar nog slaai van gisteraand oor? Die meeste meisies, veral tieners, is mal daaroor om slaai skool toe te neem.
Maak geblikte tuna met mayonnaise op bruin- of
volgraanbrood, jogurt en ’n vrug of ryskoekies met roomkaas en koue vleis. Grondboontjiebotter in ’n klein houertjie met appelskywe om daarin te doop kan dalk net van jou die kosblikheld van die dag maak!
Bederf hulle met humus of avokado-doopsous waardeur hulle rou groentestokkies kan sleep. Maak jou eie doopsouse tuis en voeg bestanddele by waaroor jou kinders mal is.
Tuisgemaakte gesondheidskolwyntjies is nog ’n fantastiese idee en daar is talle resepte beskikbaar wat nie suiker bevat nie, byvoorbeeld murgpampoentjie-kolwyntjies.
Het jy nog kreatiewe idees vir ’n kosblik propvol gesonde lekkernye? Laat ons weet!