Suiwer jou sosiale media van vorige verleenthede
Begin die jaar skoon deur sosiale media plasings uit te vee wat jou weer kan laat bloos
WIE bloos nie soms oor foto’s en boodskappe in die sosiale media nie? Kiekies wat jou skaam maak, betrokkenheid by bekgevegte, snedige aanmerkings, onvanpaste grappe . . . In een onbesonne oomblik kan jy iets op jou sosiale media blaaie publiseer wa tjou later in ’n groot verleentheid laat.
In die ou dae was so ’n oordeelsfout gou vergete. Maar dit was vóór sosiale media, wat ’n baie lang geheue het.
Noudat die nuwe jaar wink, wens baie mense hulle kan hul sosiale media flaters van die verlede uitwis en weer vars begin.
Trevor Noah, die Suid-Afrikaans gebore komediant en aanbieder van Amerika se gewilde kletsprogram The Daily Show, is dalk een van dié mense.
In 2013 was hy in die sop oor een van sy grappe. “Alle vroue van elke ras kan mooi wees,” het hy gesê. Maar toe voeg hy by: “Ek weet party van julle sit nou daar en dink: ‘O ja, Trevor, maar ek het nog nooit ’n mooi Australiese inboorling gesien nie . . .’ ”
Toe die ondeurdagte grap destyds op YouTube gedeel is, het hy dit hotagter gekry. Die videogreep is intussen verwyder, maar dit het vanjaar nogmaals op Twitter opgeduik. En weer het Trevor onder skoot gekom – veral deur Australiërs, wat ’n boikot teen sy Tour Down Under-toer na dié land bepleit het.
Trevor moes kliphard die vure in die sosiale media doodslaan en sy Augustustoer Doer Onder het heel voorspoedig verloop. Maar in die proses het ander twyfelagtige twiets wat hy al in die verlede gestuur het ook weer versprei.
Nou is die vraag: Kon Trevor iets gedoen het om te keer dat sy blapse van jare gelede weer kop uitsteek?
Wel, ’n sosialemedia-oudit kon hom baie probleme gespaar het. En dis iets wat ons almal gereeld behoort te doen, sê Katie Linendoll, ’n Amerikaanse kenner van verbruikers tegnologie.
“Jou teenwoordigheid in die sosiale media is ’n advertensiebord vir die wêreld,” verduidelik sy. “Sosiale media soos Twitter en Facebook het 10 jaar van argiewe waardeur jy kan grawe. Dis tyd om te dink: ‘Het ek ’n digitale skoonmaaksessie nodig?’ ”
Maar hoe skrop jy jou digitale verlede skoon? Volg hierdie stappe sodat jy in 2019 sommer op ’n skoon blaadjie kan begin.