’N BLINKNUWE BEROEMDE ‘BENDE’
Die kinders van die 1990’s se wilde Primrose Hill Set volg in hul glansspore
IN DIE 1990’s was hulle die room van die Britse vermaakbedryf – die akteurs, rocksterre en supermodelle van wie almal alles wou weet.
Boonop het Londen se blinkste glansmense soos die akteurs Jude Law, Ewan McGregor en Sienna Miller, die rockerbroers Liam en Noel Gallagher en die supermodel Kate Moss almal op dieselfde tyd in die spogbuurt Primrose Hill nesgeskop.
Dié A-lys-kliek was dan ook as die “Primrose Hill Set” (PHS) bekend. En natuurlik het hulle oor en weer gekuier en gekafoefel. Al het hulle hoe hard probeer om hul persoonlike lewe privaat te hou, het stories oor wilde partytjies agter geslote deure tog uitgelek.
Vandag, 20 jaar later, blyk dit dat die Britte se eertydse “Brit Pack” ’n nuwe blaadjie omgeslaan het. Hulle dra nou swaar aan hul verantwoordelikhede as die ouers van ewe talentvolle spruite wat self flink naam maak.
Neem maar die wêreldbekende supermodel Kate Moss (44) as voorbeeld. Dié is deesdae ’n vurige voorstander van alkoholvrye dae en behoorlike nagrus pleks van laatnagpartytjies. Lila (16) volg reeds in Kate se spore in die modewêreld onder die wakende oog van haar ma, wat ook haar bestuurder is.
Ná ’n mislukte verhouding met Lila se pa, Jefferson Hack (47), ’n Britse mediabaas, en ’n verbrokkelde huwelik met die Britse sanger Jamie Hince (50) het sy nou liefde gevind by ’ n katelknaap, graaf Nikolai von Bismarck (30), ’n fotograaf uit die Duitse adelstand.
Ook Kate se boesemvriendin Meg Matthews (51) se dae as partytjiemeisie is lank reeds verby. Luidens berigte is sy deesdae ’n geheelonthouer wat graag raad oor menopouse uitdeel.
Meg en die Oasis-rocker Noel Gallagher (51) se vier jaar lange huwelik het in 2001 op die rotse geloop. Hulle het toe hul huis verkoop en Primrose Hill vaarwel geroep.
Nog ’ n glanspaar wat deel van die PHS was, die aktrise Sadie Frost (53) en die Hollywoodhartebreker Jude Law (46), is in 2003 geskei ná ’n huwelik van sewe jaar. Hulle het drie kinders saam.
Sadie is deesdae ’n groot joga-aanhanger. Haar eks, die pa van altesaam vyf kinders, is steeds in lokettreffers soos die Fantastic Beasts-fliekreeks te sien.
Toe die beroemde buurt se glanspare uitmekaar is, het party van hulle ook Primrose Hill se stof van hul voete geskud. Maar al het dit die einde van die oorspronklike PHS beteken, is hul kinders deesdae ewe geheg aan mekaar en amper net so bekend soos hul ouers.
Anders as die ouer garde wat die paparazzi probeer ontwyk het, leef hul kinders in die era van die sosiale media en is hulle allesbehalwe publisiteitsku. Soos Rafferty Law, Jude en Sadie se modelseun, dit stel: “Anders as met my pa, is roem iets waarmee ek grootgeword het. Almal vra altyd hoe dit voel, maar vir my is dit bloot normaal. Ek ken nie enigiets anders nie.”
Ontmoet die nuwe PHS.