Fees en vakansie in Charlene se paleis
Prinses Charlene het ons uit Monaco ’n by tye kostelike kykie gegee na haar gesin se Kersfees en die tweeling se verjaardag
SY IS die blonde prinses wat die wêreld aan haar voete het, in ’n pienk paleis met ’n uitsig op die Middellandse See woon en by glansgeleenthede aan die sy van prins Albert van Monaco verskyn. Maar wanneer prinses Charlene oor die afgelope jaar terugkyk, klink sy nes enige doodgewone ma wat haar hande vol het met haar kroos en dagtake.
Sy is “stokflou” en “uiters gereed vir ’n vakansie”, sê die voormalige SuidAfrikaanse swemkampioen vanuit die paleis in Monaco in ’n eksklusiewe onderhoud met Huisgenoot.
Charlene (40) het immers ’n bedrywige jaar agter die rug waarin haar vierjarige tweeling, kroonprins Jacques en prinses Gabriella, begin skoolgaan het en Albert sy 60ste verjaardag gevier het.
Tussen al haar adellike verpligtinge deur het sy ook Suid-Afrika toe gekom om ’n oog te hou op haar swemstigting wat verdrinkings probeer bekamp.
“Die afgelope jaar was ’n goeie jaar,” sê sy. “En ek besef altyd hoe geseën ek is. Ek het twee gesonde kinders wat vir my soveel liefde en geluk bring.”
Soos enige ma loop Charlene oor van
trots wanneer sy van haar kroos vertel. “Hulle is slim, goedgemanierd en goedhartig. Hulle weet wat hulle wil hê, hulle druk hulself baie goed uit en verstaan baie dinge goed. Ek kan skaars glo hulle is al vier jaar oud.”
Die tweeling word inderdaad vinnig groot. Hul eerste skooldag het in September 2018 aangebreek toe hulle ’n kleuterskool begin bywoon het. Hul ma het foto’s van dié mylpaal in hul jong lewe met haar 91 000 volgelinge op Instagram gedeel.
“Hulle is lief vir skool,” vertel Charlene oor die twee blondekoppies. “Gabriella staan selfs op ’n Saterdag op en wil skool toe gaan. Dan is sy baie teleurgesteld wanneer ons sê dis nie ’n skooldag nie.
“Ek is verstom oor hoe vinnig hulle leer – hulle kan klaar Frans en Engels vlot praat. Ek weet ek kan nooit my kinderjare vergelyk met die wêreld waarin hulle gebore is nie.
“Al wat ek vir hulle kan gee, is al my liefde, beskerming en aanmoediging, om hulle respek te leer en hulle so ’n normaal moontlike opvoeding met tradisionele waardes te gee as wat ek kan.”
Al lei Charlene nou as prinses ’n bevoorregte lewe, sê sy sy sal altyd haar wortels onthou. Sy beskou Suid-Afrika steeds as haar tuiste.
“Ek vergeet nie waar ek vandaan kom nie, en ek weet daar is baie mense wat ly. Ek lees die koerante, ek hoor die mense praat . . . Ek weet, en my hart is by julle almal,” beklemtoon sy.
“Al wat ek vir julle kan sê, is ek doen my bes vir julle. Ek het my stigting in SuidAfrika geskep om vir mense ’n vaardigheid te leer om lewens te red – noodhulp, waterveiligheid en hoe om te swem.”
Die Olimpiese swemmer is steeds geesdriftig oor alles wat met watersport te doen het. Een van haar 2018-hoogtepunte was toe haar span die jaarlikse waterfietsren in Monaco gewen het.
Haar stigting is by nog ’n sport betrokke wat haar na aan die hart lê – rugby. Vroeër vanjaar het dit ’ n span jong mense van Kaapstad geborg om aan die Saint Devote-rugbytoernooi in Monaco deel te neem.
Verlede maand was Charlene ook by die sewesrugbytoernooi in Doebai saam met haar tweeling. Daar het hulle die Impi’s gaan ondersteun – ’n span met spelers van Monaco se nasionale span asook ander internasionale spelers onder leiding van Charlene se broer Gareth Wittstock en ’n eg Suid-Afrikaanse naam.
In 2019 sal Charlene meer betrokke raak by sewesrugby. Sy sal ook druk besig wees om as ambassadeur vir die Internasionale Automobielfederasie padveiligheid te bevorder.
Hier op die drumpel van ’n nuwe jaar het die prinses uit Monaco ingestem om met Huisgenoot te praat in die “hoop dat as ek iets oor my gesin met julle deel dit iemand gelukkig sal maak en ’n bietjie inspirasie, lag en geluk sal bring”, sê sy.
Dan bied sy ons ’n kykie agter die pienk mure van die Prins Se Paleis wanneer sy van haar gesin se Kersviering en die tweeling se vierde verjaardag in Desember vertel.
DIE FEESTYD IN DIE PIENK PALEIS
“Eerlikwaar, die feestyd is spesiaal, maar terselfdertyd stresvol,” erken Charlene. “Dit voel óf te lank óf nie lank genoeg om gehaltetyd saam met familie en vriende deur te bring nie.”
Sy en Albert en hul kroos bring Kersfees by die paleis deur, waar hulle ’n feesmaal geniet omring deur geliefdes.
Onder hul hegste vriende uit Suid-Afrika wat gereeld in die Kerstyd kom kuier, is die voormalige Springbokkaptein Francois Pienaar en sy vrou, Nerine, wat ook klein Gabriella se peetma is. Hulle bring gewoonlik ’n sak vol tradisioneel Suid-Afrikaanse lekkernye saam – Char-
(Blaai om)
lene is gaande oor Mrs Ball’s-blatjang, beskuit, biltong en droëwors.
’n Mens sou dink as ’n prinses sal sy nie hoef rond te skarrel om alles vir die feestyd gereed te kry nie, maar dis nie die geval nie.
“Ek moet al die dinge inryg en geskenke op die nippertjie koop,” vertel die raakvatma wat ook vele amptelike verpligtings moet nakom.
Kersfees in die hartjie van die winter het ’n sekere bekoring vir die prinses uit sonnige Suid-Afrika.
“Daar is sneeu op die berge. Dis koud, die kaggelvure brand, en waar jy ook al gaan, hoor jy Kersliedere en sien jy die mooi Kersbome en -liggies. Almal is warm toegewikkel en die geur van kaneel is oral.”
Dié snoesige prentjie verskil hemelsbreed van Kerstyd in haar grootwordjare in Gauteng toe sy saam met haar gesin in die sonnige somerweer geswem en vleis gebraai het.
Maar of jy nou ’n kind in Suid-Afrika of Monaco is, Kersvader sal wel met ’n sak vol geskenke by jou uitkom . . .
Jacques en Gabriella glo vas in Kersvader, vertel hul ma. “Hulle tel die dae af tot Kersvader in die skoorsteen afklim en al hul presente bring.”
Op Oukersaand woon Charlene en Albert saam met ander lede van die koninklike familie ’n mis in die paleiskapel by. Daarna ruil die grootmense geskenke uit.
Die kinders is gretig om bed toe te gaan voor Kersvader opdaag. “Hulle sit altyd ’n glas melk en koekies vir hom reg en ook water en gras buite vir die rendiere,” sê sy.
Kersoggend word gewoonlik ingelui met “die geklap van voete wat ronddraf, hondjies wat blaf en geskenke wat ongeduldig oopgemaak word.
“Ons kom almal om die Kersboom bymekaar. Albert is op sy gelukkigste by die kinders en dra altyd iets feesteliks.”
Vanjaar het Charlene gesorg dat sy ’n skêr byderhand het om verpakking oop te sny en ook batterye reg gehou