KATTE ONVEILIG WEENS SKIETER
Iemand in ons meenthuiskompleks het my katjie met ’n haelgeweer geskiet en haar baie seergemaak. Die dag toe ons intrek, het ’n buurman gesê hy hoop nie ons het diere nie. Ons het nie werklik bewyse teen hom nie, maar ander inwoners het al soortgelyke ervarings gehad. Ek is baie kwaad hieroor, maar weet nie wat om te doen nie. Ek wil keer dat so iets weer met my of met ander mense se diere gebeur. F op K
’n Mens moet altyd waarde aan ’n dier se lewe heg, maar dit is ongelukkig nie almal se ingesteldheid nie.
Ingevolge die Dierebeskermingswet van 1992 is dit ’n strafregtelike oortreding om ’n dier met ’n haelgeweer te skiet en die oortreder kan vervolg word as daar genoeg bewyse is om hom skuldig te bevind.
So iemand kan ’n boete van tussen R10 000 en R15 000 opgelê word.
Omstandigheidsgetuienis is ongelukkig nie genoeg nie. Jy en ander eienaars in die kompleks wie se diere geskiet is, kan as ’n groep ’n klag by die polisie in- dien met besonderhede van die voorvalle en ook foto’s van die beseerde diere as dit moontlik is.
Dit kan ook help om as ’n groep met ’n verteenwoordiger van die plaaslike DBV te gesels oor stappe wat gedoen kan word om jul diere se veiligheid eerste te stel.
Dit is noodsaaklik om die beheerraad van die meenthuiskompleks van hierdie voorvalle in kennis te stel sodat rekord daarvan gehou kan word.
Dis ook ’n goeie idee om ’n WhatsAppgroep vir die inwoners te begin waar julle onmiddellik sulke voorvalle onder mekaar se aandag kan bring. Dit sal die skuldige laat besef sy wreedheid teenoor diere gaan nie ongemerk verby nie.
As ’n verantwoordelike diere-eienaar moet jy sorg dat jy die reëls van die kompleks nakom wat troeteldiere betref. Veral mannetjieskatte kan ’n oorlas vir ander wees, maar dit gee niemand die reg om hulle leed aan te doen nie.
As kateienaars kan julle jul kant skoon hou deur toe te sien dat jul diere reggemaak is, teen siektes ingespuit is, met mikro-identifikasieskyfies toegerus is en ’n halsband met besonderhede soos jou adres en selfoonnommer aanhet.