Mowgli: Legend of the Jungle
Dié fliek is die perfekte kykgenot vir die laaste paar dae van die skoolvakansie
BEKENDE VERHAAL
Die lewendige aksie, wat op die stroomdiens Netflix beskikbaar is, is gegrond op die Britse skrywer Rudyard Kipling se geliefde storieversameling The Jungle Book. Dit draai om ’n seuntjie, Mowgli, wie se ouers deur ’n tier, Shere Khan, doodgemaak word. ’n Trop wolwe maak hom dan in ’n oerwoud in Indië groot.
Mowgli is donkerder as die Disneyanimasieprent The Jungle Book van 2016, sê die Black Panther-akteur Andy Serkis, wat in die regisseurstoel sit. Hy is ook die stem van die beer Baloo, wat ’n mentor vir Mowgli is. “Die diere sing of dans nie,” sê Andy (54). Mense dink aan Baloo as die singende, dansende beer, maar hy’s die “teenoorgestelde” in Mowgli. “Hy is soos ’n drilsersant uit die Krimoorlog.”
TITELROL
Rohan Chand (14), die jong Amerikaanse akteur wat Mowgli speel, is geen groentjie in die vermaakbedryf nie. Hy’t op ses sy eerste fliekrol losgeslaan as Adam Sandler se seun in die komedieprent Jack and Jill (2011) en was twee jaar later ook saam met Jason Bateman in Bad Words en Mark Wahlberg in Lone Survivor te sien. Die rol van Mowgli was uitdagend, veral omdat hy soos die ander diere op sy hande en voete moes hardloop, vertel hy. Ter voorbereiding het Rohan onder meer ’n wolfkamp in New York besoek. Voor hulle begin skiet het, het hy ook hardloop- en gimnastiekopleiding gekry om sy stamina ’n hupstoot te gee.
STERBELAAIDE STEL
Die fliek spog met ’n indrukwekkende rolverdeling. Die oud-Batman Christian Bale (44) is die stem van die luiperd Bagheera, wat Mowgli onder sy vlerk neem; Doctor Strange, oftewel Benedict Cumberbatch (42), die stem van die gevreesde tier Shere Khan; Cate Blanchett (49) dié van die sinistere slang Kaa; en die Skyfall-aktrise Naomie Harris (42) dié van Nisha, die vroulike wolf wat Mowgli as haar eie aanneem.
Op die stel het kunstenaars vir die diere se “lyf ”-bewegings gesorg en die akteurs vir hul gesigsuitdrukkings en stemme. “Ons het die beeld van die akteur en die foto van die dier saamgevoeg sodat hulle mekaar as’t ware in die middel ontmoet,” sê die vervaardiger, Jonathan Cavendish. “Die eindproduk is ’n tier wat vreemd genoeg lyk en presies soos Benedict Cumberbatch klink, maar die persoonlikheid en gevoel van ’n vreesaanjaende wilde dier het.”
DIE SA KONNEKSIE
Groot dele van die fliek is by Warner Bros. Studios in Leavesden in Hertfordshire, Engeland, geskiet. Hulle het ook hier in Suid-Afrika op Port Edward, twee uur van Durban af, 27 hutte opgerig om ’n 19de-eeuse Indiese dorpie na te boots, sê die produksieontwerper Gary Freeman. Hulle het 88 mans, vroue en kinders uit die nabye Durbanse Indiese gemeenskap gekry om saam met Rohan en die Slumdog Millionaire-aktrise Freida Pinto se karakter, Messua, deel van ’n tradisionele Hindoe Holi-fees te wees wat die koms van lente vier. Nie een van hulle was al voorheen in ’n fliek nie.
Op die Suid-Afrikaanse stel was uitdagings soos ape wat appels probeer steel het by die span wat etes voorsien, en die slangvanger, ’n plaaslike inwoner, moes bontstaan om slange van die stel af te verwyder. Daaronder was ’n swart mamba, drie groen mambas en agt nagadders.