Hierna kan ons uitsien in die wêreld van kos, mode, dekor en skoonheid
Om nie sommer enigiets in jou mond te druk nie was nog altyd op die radar. Nou is die fokus op permanente leefstylveranderings en nie net ’n vinnige dieet om gewig te verloor voor ’n groot gebeurtenis nie. Etiese koskeuses speel ook ’n ál groter rol waar die verbruiker wil weet of diere, mense of die omgewing skade aangedoen is ter wille van dit wat op jou bord is.
PLANTGEBASEERDE
ETES word meer as net ’n foefie met ál meer mense wat nee sê vir vleis. Proteïen word ingekry uit bone, sade, lensies en quinoa.
Veganistiese opsies in restaurante en kruidenierswinkels word meer volop sodat dit makliker word om ’n plantgebaseerde eetplan te volg.
Vir diegene met ’n suikertand sal klaargemaakte nageregte sonder enige diereprodukte ook beskikbaar raak.
GEURIG Verby is die dae toe gesonde kos taamlik smaakloos was. Ongesonde bestanddele soos suiker, vet en sout wat gebruik is om geur te gee word ál meer vervang deur natuurlike kruie en
speserye. Pesto gee geur aan byvoorbeeld blomkoolsteaks, en vrugtepuree of droëvrugte gee ’n soet smaak aan koek en tert. PERSOONLIKE BEHOEF
TES Jy wil meer uit jou kos hê. As jy gereeld oefen, soek jy pasta wat energie gee; as jy ’n besige ma is, soek jy visvingers wat goed is vir jou kinders. Wees op die uitkyk na ál meer kossoorte wat verryk is met mikronutriënte.
BETER KEUSES Tradisioneel ongesonde produkte kry ’n nuwe, gesonder baadjie met proteïenryke bestanddele of minder kilojoules. Sjokolade- mousse word byvoorbeeld met avokado pleks van room gemaak, tjips word van kekerertjies of lensies pleks van aartappels gemaak, piesang of avokado is die hoofbestanddeel in roomys, en focaccia kry groente as basis waar ’n deel van die meel deur byvoor-
beeld krulkool vervang word.
NUWE VERSOETER Inulien, ’n natuurlike, plantgebaseerde versoeter, het ’n lae GI, bevat baie vesel en het probiotiese voordele. Dit word in vrugte en groente soos artisjokke, sigorei, piesangs en uie aangetref
Mexikaanse kos is al jare lank gewild, maar taco’s vat nou behoorlik die koswêreld oor. Nuwe bestanddele soos spinasie en soetpatat word gebruik om die tacoskulp te maak en nie mieliemeel nie. Ons kan ook uitsien na taco’s met heerlike soet vulsels.
Van hoender à la king tot gevulde eiers; van vleisbrood tot gebakte Alaska en fondue – jou ouma sal kan hand bysit.
Proteïen word ’n ster in die kombuis. Dit word gevoeg by allerhande produkte soos energiestafies, pasta, tjips en ontbytkos.
Proteïendrankies kom in opwindende nuwe geure soos papaja, vanieljekoek en botterkaramel.
Latyns-Amerikaanse kos van lande soos Ecuador, Peru en Brasilië is op almal se borde. Daar is streeksverskille, maar rissies, mielies, peulgroente, aartappels, seekos en gebraaide vleis maak hul verskyning op groot skaal.
Marokkaanse kos met sy kenmerkende speserye word ook ál wyer gewild.
MINIKOEK Vergeet van die basaartafel se grootkoeke. Hulle is nou kleiner en word in ’n blikkie gebak. Dit en ’n ryk beslag sorg dat hulle langer vars bly. Jy kan dit maklik vervoer en net so present gee. CROQUEMBOUCHE Nog ’n gier van ’n paar dekades gelede keer terug: die indrukwekkende stapel roompoffertjies wat met suikerdrade afgerond is. Nou word dit gemaak van mini-oliebolle, sjokoladetruffels of madeleines vir ’n byderwetser gevoel. MINDER IS GENOEG Troukoeke word eenvoudiger. Pleks van dik versiersuiker en allerhande suikerkuns is daar eerder vars blomme en/of vrugte as versiering. WAFELS Hierdie heerlikheid word aan ’n stokkie geryg en so voorgesit of in ’n dekadente stapel.
Dis iets wat besige ma’s al lank doen, maar dit word nou wêreldwyd ’n gewilde manier van kook. Dit bespaar tyd en voorkom dat met kos gemors word. Op ’n naweekdag word volgens ’n beplande spyskaart vir die daaropvolgende week gekoop, geskil, gekap en gekook.
Kos vir die werkkosblik word vooraf berei en in individuele bakkies in die yskas gehou, gereed vir gryp in die oggend.
Jenewer is steeds op almal se lippe, veral die pienk soort. Maar hier’s ’n nuwe kandidaat wat die kollig steel, naamlik rum, en veral donker rum. Vermoet, ’n gefortifiseerde wyn wat tradisioneel in Italië en Frankryk gemaak word, word ook gewild. In pas met die wêreldwye begeerte na ’n gesonder lewe is daar ’n groot vraag na nie-alkoholiese wyn en bier. Veganistiese en organiese wyn geniet ook aandag.
Dis moontlik ’n mode wat op Instagram begin het, naamlik om pienk en pers vrugte en groente op ’n bord te pak omdat dit kosfoto’s so mooi laat lyk.
Dink byvoorbeeld aan pers kool, radyse en bloubessies wat ’n slaai ekstra kleurryk en smaaklik laat lyk. Eetbare blomme soos laventel en gesiggies word ook graag gebruik.