KONINKLIKE BABABOEPIES
Meghan is, soos ’n waarnemer van die koninklikes dit stel, “tipies Amerikaans” – en die Britte reken dit is nog duideliker noudat die hertogin swanger is.
Dit is baie on-Brits om die aandag op jou bababoepie te vestig, maar Meghan steur haar duidelik nie daaraan nie.
Sedert sy en Harry bekendgemaak het Baba Sussex is op pad, is haar hande pal op haar boepie. Sy vermy ook kraamdrag en spog eerder met haar groeiende magie in ontwerpersklere.
“Sy is net nie gereed daarvoor nie,” sê ’n bron. “Sy geniet dit om gewone klere te dra wat haar magie wys. Sy is trots daarop.”
Kate het tydens haar drie swangerskappe selde aan haar maag geraak en kraamdrag uit die voorste modewinkels en soms ’n ontwerpersnommer gedra.
“Met elke swangerskap het die hertogin getrou aan haar sjiek stylsin gebly deur jasse met ’n gordel, los slooprokke en rokke met ’n empiremiddel te dra,” sê modeskrywers van die tydskrif Good Housekeeping. In van dié uitrustings is sy ná die geboortes weer gesien.
Koningin Elizabeth het destyds tydens haar swangerskappe skaars van haar beproefde en vertroude baadjiepakke afgewyk – al was die rokke meer vloeiend en die jasse ruim genoeg om haar steeds waardig en fatsoenlik te laat lyk.