VIND G’N GELUK BY WERKLOSE MEISIES NIE
My pelle begin nou trou. Ek gaan al 10 jaar aan en af met meisies uit, maar niks werk eintlik uit nie. Ek kom nou agter die meeste van die meisies was werkloos. Beteken dit iets? W, SMS As ’n reeks verhoudings almal dieselfde patroon volg, het dit dikwels met ’n diepliggende onvervulde begeerte te make. Jy bly by dieselfde put drink, al word jou dors nie daar geles nie.
Moontlik glo jy steeds – strydig met alle moderne neigings – die man moet die broodwinner wees en soek jy verhoudingsmaats uit wat by daardie prentjie sal inpas.
Jy is dalk ook iemand wat graag jou vrou wil onderhou en versorg omdat jy so grootgemaak is.
Dit kan ook wees dat jy dit geniet as ’n verhoudingsmaat afhanklik van jou is.
Dit gee jou dalk meer selfvertroue, ’n magsposisie en die gevoel dat haar wêreld net om jou draai.
As jy vir ’n slag met ’n vrou uitgaan wat haar eie geld verdien, kan dit jou mening verander oor wat jy werklik in ’n verhoudingsmaat soek.
Vir ’n emosioneel volwasse man sal so ’n vrou glad nie ’n bedreiging wees nie.
Kies ’n slag ’n metgesel vir ’n afspraak wat met ’n volgende aandjie uit die rekening vir julle albei kan betaal en kyk hoe dit jou laat voel.
Al sal dit dalk spanning by jou veroorsaak, kan dit ’n manier wees om die kringloop te verbreek.
En loop maar lig vir troukoors; dit kan aansteeklik wees . . .