Wat wys nog?
3 DAYS TO GO Dramakomedie. Met Leeanda Reddy, Lillete Dubey and Kajal Bagwandeen. Regisseur: Bianca Isaac. 13 DTG.
Die Isaac-kroos kom weer bymekaar by hul ouerhuis toe die patriarg, Gabriel Isaac (Rueben Naidoo), skielik sterf. Hul ma, Lakshmi (die Bollywoodster Lillete Dubey), en haar naasoudste kind, Janet (Reddy van Isidingo-faam), verwelkom die ander drie volwasse kinders en hul gesinne toe hulle hul pa kom groet. Daar is duidelik heelwat onopgeloste kwessies tussen hulle.
Die fliek beeld ’n gesin uit wat die verlies van ’n familielid moet hanteer terwyl elkeen probleme in hul eie lewe ervaar. Dié tragedie kan hulle dalk verder uitmekaar laat wegdryf – of eindelik ná jare weer ’n hegte band tussen hulle smee.
Ondanks goeie spel deur die meeste van die akteurs slaag hulle by tye nie daarin om die hartroerende oomblikke by kykers tuis te bring nie. Die regisseur sukkel ook soms om kykers ewe geïnteresseerd in elk van die familielede se probleme te hou.
Tog is dit ’ n goedvoelfliek waarby mense steeds maklik aanklank sal vind danksy die storielyn. Dis ook goeie kykgenot vir die familie.
Drama is die middelpunt waarom alles draai, en af en toe sal jy giggel vir ’n toneel. Dit kan kykers selfs help om hul eie familieprobleme te pak.