PA MAAK SPORE, BETAAL NIE ONDERHOUD NIE
Ek was lank in ’n verhouding met ’n man en het ’n seuntjie by hom. Hy is terug na sy geboortestad en het nie gesê hoekom hy my gelos het nie. Hy betaal nie onderhoud nie. Moet ek hom hieroor aangee? Ek ken sy identiteitsnommer, maar was nog nooit in sy geboortestad nie.
M, SMS
In die reg word kinders se behoeftes eerste gestel, en geregtigheid moet vir hulle geskied. Jy moet so gou moontlik na ’n onderhoudsbeampte by jou naaste landdroshof gaan en met dié se hulp ’n aansoekvorm vir die betaling van onderhoud invul. Jy het nie ’n prokureur hiervoor nodig nie.
Jy moet die volgende dokumente saamneem: jou identiteitsdokument, die identiteitsnommer van jou kind se pa, sy adres en selnommer, sy werknemer se adres as jy dit het, jou kind se geboortesertifikaat, jou bankstaat of ’n verklaring dat jy nie ’n bankrekening het nie, ’n lys van jou kind se lewensbehoeftes soos kruideniersware, mediese sorg en klererekenings met strokies, kwitansies en fakture aangeheg, en ook ’n munisipale rekening met jou naam en woonadres daarop. As jy nie dit alles het nie, neem die dokumente saam wat jy wel het.
As die pa onopspoorbaar is, kan die hof ’n ondersoeker opdrag gee om hom op te spoor. Wanneer die pa opgespoor word, sal die ondersoekbeampte vir jou ’n saaknommer en ’n hofdatum gee. Hy sal dan ’n dagvaarding kry dat hy in die hof moet verskyn.
Die onderhoudsbeampte kan vooraf samesprekings hou sodat jy en jou eks op die bedrag kan besluit wat hy as onderhoud gaan betaal. Dit word dan ’n bevel van die hof gemaak. Maar as julle nie daaroor kan ooreenkom nie, word die saak na die hof verwys om ’n onderhoudsbevel te maak.
Versuim om onderhoud te betaal nadat ’n bevel toegestaan is, is ’n strafregtelike oortreding en strafbaar met ’n boete of gevangenisstraf.
Doen intussen aansoek by die departement van maatskaplike ontwikkeling in jou omgewing vir ’n kinderonderhoudstoelae.
Hou in gedagte dat albei ouers ’n onderhoudsplig teenoor ’n kind het.