Nuut op die rakke
Twee boeke vir oud en jonk
ANNE FRANK’S DIARY: THE GRAPHIC ADAPTATION Deur ARI FOLMAN & DAVID POLONSKY (Viking, R239*)
Ek moet erken ek het ernstig voorbehoude gehad toe ek die eerste keer van dié boek hoor. Was dit regtig ’n goeie idee om ’n grafiese roman van Anne Frank se dagboek te maak? Daar was sekerlik die gevaar dat ’n ligsinnige aanslag die gruwels van wat Anne en haar gesin beleef het, kon verminder.
Gelukkig was my bekommernisse ongegrond. In werklikheid gee die illustrasies vir die leser ’n beter begrip van die lot van Anne en die ander Joodse inwoners van daardie geheime Amsterdamse anneks.
Jy kry ’n gevoel van hul vrees en kloustrofobie, verveling en daaglikse irritasies terwyl hulle vir die Nazi’s weggekruip het. Anne se intelligensie en humor sowel as haar drome kom ook na vore. Al ken jy die verhaal, sal dié weergawe jou hoendervel gee.
Anne was net 13 toe sy en haar mense genoodsaak is om weg te kruip – twee jaar lank was hulle in die anneks gekluister. Hierdie weergawe eindig stomp, nes haar dagboek – 1 Augustus 1944 was haar laaste inskrywing. ’n Paar dae later het die Nazi’s die wegkruipplek ontdek.
Die tiener is weggevoer na die BergenBelsen-konsentrasiekamp in Duitsland, waar sy ’n paar maande later dood is net voor haar 16de verjaardag.
Maar haar dagboek het dit oorleef en word vandag nog beskou as een van die besonderste boeke van die vorige eeu. As jy die grafiese roman lees, sal jy begryp hoekom. Volwassenes, maar ook tieners, sal aangegryp word.