VRAE OOR PA SE SELFDOOD

Ek is uit eie keuse ’n enkelouer. Die pa het ons kindjie net een keer skrams gesien. Ek het deur die jare geen kontak met hom gehad nie. Nou het ek met ’n omweg gehoor hy het sy eie lewe geneem. Ek en my kind het ’n oop verhouding. Hy weet van sy pa en wat in ons verhouding verkeerd geloop het. Ons moet binnekort vele aanpassings maak. Ek weet nie hoe om hom van sy pa se selfdood te vertel nie. K op D As jou kind nie die waarheid by jou hoor nie, kan hy dalk uit ’n ander oord daarvan te hore kom. Met so ’n gekompliseerde verlies kan halwe of verdraaide feite groot skade doen; daarom moet jy van die feite seker maak voor jy jou kind op ’n liefdevolle manier daarvan vertel.

Wanneer jy die nuus oordra, moenie die situasie te omslagtig of met te veel detail verduidelik nie. Wees net voorbereid op enige vrae.

Dit sal hom ’n rukkie neem om die nuus te verwerk. Weens vertraagde skok kan hy hom dalk in dié tyd onttrek. Jy sal die kommunikasiekanale moet oophou vir ’n opvolggesprek. Gesels dan met hom oor selfdood in die algemeen. As sy pa se selfdood dalk depressieverwant is, sal jy ook meer oor dié psigiese siekte te wete moet kom.

’n Gevoel dat sy pa hom verwerp het, kan nou nog sterker by jou kind word. Dalk het hy heimlik ’n droom gekoester dat hy sy pa eendag sou ontmoet. Skuldgevoelens kan ook ’n rol speel as hy sy pa dalk in sy gedagtes iets slegs toegewens het. Probeer ná die aanpassing wat julle moet maak so gou moontlik weer ’n sterk steunnetwerk opbou. Jou kind kan mettertyd ’n behoefte ontwikkel om sy familie aan vaderskant te kontak. Ek stel voor dat jy dié moontlikheid reeds nou met ’n berader bespreek.

Ná die verlies van sy pa kan skeidingsangs ’n uitdaging in jul verhouding word. Verseker hom gereeld dat jy gesond en gelukkig is, en smee jul bande nog hegter.