Hoekom Irina dit privaat hou

Die verhouding tussen die model Irina Shayk (33) en die akteur Bradley Cooper is nie ’n geheim nie. Bradley (44) het immers nie geskroom om sy beeldskone meisie tydens sy onlangse Baftaaanvaardingstoespraak te bedank nie. Dié twee praat nie graag oor hul persoonlike lewe nie. Hulle het in 2017 ’n dogter, Lea de Seine Shayk Cooper, gehad en wil haar teen die kollig beskerm.

Irina het dit nou in ’n onderhoud aan Glamour UK probeer verduidelik. “Ek het talle vriende wat baie van hul persoonlike lewe op Instagram of ander sosiale media deel. Ek bewonder dit en dink dis wonderlik, maar alles gaan oor persoonlike keuse,” het sy gesê. “Omdat my werk vereis dat ek in die openbare oog is, het ek net besluit my persoonlike lewe sal stil wees. Dis hoekom dit ‘persoonlik’ genoem word: Dis iets vir jou en jou gesin, en ek is gelukkig daarmee.”