Local Is Lekker
Die wenners wen van Huisgenoot en kykNET se tweede liefdesverhaalkompetisie liefdesv het onlangs ’n voorsmakie van die kollig gekry. Omdat Hugo en Mardaleen Derks se ware liefdesverhaal in ’n fliek omskep gaan word, het die Pasella-aanbieder Sasha-Lee Davids in die maand van v die liefde by hulle in Namibië gaan inloer.
Die onderhoud is op die gasteplaas Otjimbondona Kalahari, suidoos van Windhoek, verfilm en op 13 Februarie uitgesaai. Mardaleen en Hugo het by die gasteplaaseienaars, Wilfried en Anita Slaney, gaan kuier.
Wilfried, wat ook ’n vlieënier is, het hulle met sy ligte vliegtuig trakteer met ’n kykie na die Namibiese landskap uit die lug uit tot digby Sossusvlei.
“Dit was heerlik om so bederf te word. ’n Mens het amper skuldig gevoel om so op ’n troontjie geplaas te word,” sê Mardaleen. “Die Slaneys is wonderlike, gasvrye mense by wie ons dadelik aanklank gevind het.”
Vir die Derks-egpaar van Gobabis in Namibië was die paadjie tot by die kansel omtrent vol kinkels, maar vandag is hulle al byna 15 jaar getroud. Hul liefdesverhaal het hulle van Potchefstroom tot Londen, Kaapstad en Namibië geneem en word binnekort verfilm.
“Ons sien baie uit na dié jaar,” sê Mardaleen. “Dis soos ’n verrassingspakkie. Ons kan skaars wag om die akteurs te ontmoet en die mense wat agter die skerms werk om lewe in ons verhaal te blaas.”