GROENTEGEBAK

Hierdie gebak is ideaal as ’n vegetariese maaltyd of selfs as bykos.

GENOEG VIR 4 MENSE (AS ’N MAALTYD) OF 6 MENSE (AS ’N BYKOS) BEREIDING: 15 MIN. GAARMAAK: 40 MIN.

15 ml (1 e) olie

1 ui, gekap

250 g sampioene, in skyfies gesny

1 bos spinasie, stingels uitgesny en gesnipper

sout en vars gemaalde peper

250 g roomkaas

2 eiers, geklits

125 ml (½ k) mozzarellakaas, gerasper

6 murgpampoentjies, in linte gesny met ’n groenteskiller

AFRONDING

125 ml (½ k) mozzarellakaas, gerasper

suurlemoen- of lemmetjiewiggies

Voorverhit die oond tot 200 °C. Bespuit ’n middelslagoondbak met kossproei.

1 Verhit die olie in ’n pan en braai die ui tot sag. Voeg die sampioene by en roerbraai tot gaar.

2 Voeg die spinasie by en roerbraai tot verwelk en tot die meeste van die vloeistof weggebraai is. Geur met die sout en peper.

3 Klits die roomkaas en eiers goed saam. Voeg die mozzarella by en meng.

4 Pak ’n laag murgpampoentjielinte in die bodem van die oondbak. Versprei die helfte van die spinasiemengsel bo-op.

5 Giet die helfte van die kaasmengsel oor die groente. Pak nog ’n laag murgpampoentjies booor gevolg deur die res van die kaasmengsel. Pak nog ’n laaste laag van die murgpampoentjies bo-op.

6 Afronding Sprinkel die mozzarella oor en bak 25 min. tot die eier gestol is. Sit voor saam met die suurlemoen- of lemmetjiewiggies.