TAMATIEBREDIESAMOESAS
LEWER 24 SAMOESAS BEREIDING: 45 MIN. GAARMAAK: 3 UUR BAK: 30 MIN.
TAMATIEBREDIE
’n skeut groenteolie
1 kg beesskenkel, ontbeen
1 ui, gekap
2 knoffelhuisies, gekap
1 brandrissie, gekap
10 g gemmer, gekap
4 heel peperkorrels
1 kaneelstok
3 heel naeltjies
3 kardemompeule
5 g brandrissievlokkies
5 ml (1 t) fyn komyn
5 ml (1 t) fyn koljander
20 ml (4 t) matige kerriepoeier
40 g tamatiepasta
1 L (4 k) vars tamatiesap
500 ml (2 k) beesvleisaftreksel
sout en peper
MENTJOGURT
15 g ment
skil van 1 suurlemoen
100 g gewone volroomjogurt
AFRONDING 24 samoesavelle 4 mini-komkommers, in lang wiggies gesny vars koljanderblare sprietuie, gekap
1 Tamatiebredie Verhit die olie in ’n groot kastrol. Seël die skenkel sodat dit bruin is en haal dit uit die kastrol. Plaas die ui, knoffel, brandrissie en gemmer in dieselfde kastrol en laat stadig sweet tot sag en deurskynend. Voeg die ander speserye by en laat sweet 2 min.
2 Voeg die tamatiepasta by en verhit nog 2 min. Voeg die tamatiesap en beesvleisaftreksel by.
3 Plaas die vleis weer terug in die kastrol en laat stadig prut tot die skenkel sag is. Geur met die sout en peper na smaak. Dit behoort sowat 3 uur te neem. Die vloeistof moet verdamp het, maar die mengsel moenie droog wees nie.
4 Vlok die beesvleis en laat heeltemal afkoel voor jy die samoesas maak.
5 Mentjogurt Was en stroop die mentblare van hul takkies af. Sny in fyn repies. Meng die repies en skil deur die jogurt.
6 Afronding Voorverhit jou braaier tot 160 °C. Samoesadeeg is deesdae in die meeste supermarkte beskikbaar. Gebruik 30 tot 40 g van die tamatiebrediemengsel per samoesa en skep dit in die hoek van die deeg. Vou die plat stuk van die deeg met die vulsel op skuins oor die strook deeg. Herhaal die vouaksie tot die deegvel heeltemal opgerol is.
7 Diepbraai tot goudbruin en sit dadelik voor saam met die jogurt en komkommer. Rond af met die koljanderblare en sprietuie.