MOOI DOGTER NOU ’N SLONSKOUS

My dogter het ’n algehele persoonlikheidsverandering ondergaan. Sy was ’n beeldskone vrou. Sy het vroeg getrou met iemand wat sy lank geken het – ’n lieflike mens – en hulle het twee kinders. Sy het baie gewig aangesit en toe begin sy alle belangstelling in haar voorkoms verloor. Sy drink ’n antidepressant, is heeltyd by dokters en is verslaaf aan pynpille. Sy regeer almal met ’n ysterhand. Haar man mag niks doen of nêrens gaan sonder haar toestemming nie. Haar kinders mag glad nie buite speel nie. Geen vriende kom daar nie, net ons en haar skoonouers as sy toestemming gee. Ek is terminaal siek en ek weet nie meer watter kant toe nie. D op M

Dit kan wees dat jou dogter aan diepliggende angs ly, gekombineer met ruimtevrees (agorafobie). Haar onversorgde voorkoms kan ’n teken wees dat sy nie meer omgee oor wat buite of selfs binne die huis aangaan nie, solank sy net nie die huis hoef te verlaat of iemand daar hoef toe te laat nie.

Hierdie angssteuring kan nie bloot met antidepressante behandel word nie. ’n Kombinasie van medikasie en sielkundige behandeling is nodig om ’n lyer se gedrag te verander.

Sulke behandeling neem tyd, want pasiënte moet geleer word om hul gedrag aan te pas en ook praktiese vaardighede aanleer om hul angs te hanteer.

Opname in ’n kliniek kan nodig wees om jou dogter van haar verslawing aan pynpille te bevry. Dié soort afhanklikheid is geneig om ál erger te word en kan haar gesondheid ernstig knou.

As ’n familie sal julle moet saamstaan en ingryp. Hou ’n familievergadering waar julle haar op ’n nieveroordelende en niebedreigende manier daarop wys dat haar optrede haar gesinsbande groot skade berokken, maar dat daar wel ’n oplossing is.

Stel dan voor dat sy by ’n sielkundige of ’n psigiater vir ’n behandelingsplan aanklop. Doen vooraf jul huiswerk en vra ’n huisdokter om iemand in jul omgewing aan te beveel.