GEMARINEERDE MURGPAMPOENTJIESLAAI
Hierdie slaai is heerlik saam met braaivleis. Hoe langer die slaai in die yskas marineer, hoe lekkerder!
GENOEG VIR 4-6 MENSE AS BYKOS BEREIDING: 20 MIN. MARINEER: MINSTENS 1 UUR 6 groot murgpampoentjies, gewas
1 knoffelhuisie, fyngekap
MARINADE
125 ml (½ k) witwynasyn
60 ml (¼ k) olyfolie
5 ml (1 t) droë ment
2,5 ml (½ t) sout
5 ml (1 t) vars gemaalde peper
AFRONDING
250 g kersietamaties, gehalveer
1-2 wiele fetakaas, in blokkies gesny
’n hand vol vars basilie, in kleiner stukkies geskeur
1 takkie ment, van die stingel gestroop en gesnipper
1 Sny die punte van die murgpampoentjies af en gooi weg. Gebruik ’n groenteskiller en sny die murgpampoentjies in linte. Plaas die linte in ’n glas- of marineerbak. Sprinkel die knoffel oor en meng liggies deur.
2 Marinade Meng al die bestanddele goed en giet oor die murgpampoentjies. Meng dit liggies deur, bedek en laat minstens ’n uur of selfs oornag in die yskas marineer.
3 Afronding Meng die res van die bestanddele deur die murgpampoentjies en sit voor.
Voeg ’n blik kekerertjies (gedreineer) en 1 gekapte rooi-ui by die slaai om die slaai vullender te maak.