Benoni-vrou: Oprah is my tweede ma
Vir ’n jong vrou wat aan Oprah Winfrey se skool in Suid-Afrika gematrikuleer het, is sy soos ’n tweede ma
VIR miljoene mense is Oprah Winfrey ’n geliefde TV- aanbieder, mediaster en een van die rykste en beroemdste mense op aarde. Maar vir ’n jong vrou van Benoni is sy bloot “Mam’ O”, die ma-figuur wat haar uit onbekendheid en swaarkry gepluk en die kans gegee het op ’n lewe waarvan sy andersins dalk nooit sou kon droom nie.
Vandag kuier Thando Dlomo gereeld by haar “ma” se huis in Chicago, waar hulle knus op die rusbank sit en reekse op die stroomdiens Netflix kyk.
“Haar huis is vir my soos my huis,” sê Thando. “The Crown is beslis tans ons gunstelingprogram.”
Thando was een van die eerste matri- k kulante aan die Oprah Winfr frey Leadership Academy for G Girls (OWLAG) in Henley-onK Klip in Gauteng. Haar opgang van armoede na voorspoed is sowel hartroerend as inspirerend en die 65-jarige Oprah bars van trots op dié uitsonderlike jong vrou.
Die ster was verlede jaar daar toe Thando (25) ’n meestersgraad in joernalistiek van die Universiteit van SuidKalifornië ontvang en het ’n toespraak op haar gradeplegtigheid gelewer.
“Sy het my sowaar haar dogter genoem toe sy op my gradeplegtigheid praat,” sê Thando terwyl sy uit Los Angeles met Huisgenoot praat.
“Dit was snaaks; sy het vir my gesê: ‘ Ek kan nie wag om jou bekend te maak nie,’ want gewoonlik verkies ek om ons verhouding geheim te hou. Toe dit gebeur, het al my klasmaats gevra: ‘Hoe het ons nie van julle twee geweet nie? Hoekom het jy ons nie vertel nie?’ Maar ek hou daarvan om dit stil te hou.”
Thando is een van die sterre in ’n stroomprogram met die titel Oprah’s Daughters op People TV, ’n kanaal wat deur dié gewilde Amerikaanse tydskrif uitgesaai word.
In die dokumentêr verskyn sy saam met Oprah en haar OWLAG-klasmaat Mpumi Nobiva en praat oor die uitwerking wat Mam’ O op haar lewe gehad het. Op haar beurt prys Oprah al die OWLAG-meisies.
In ’n openhartige oomblik noem Oprah hulle ook “die dogters wat ek nie gehad het nie.
“Ek het nooit gedink die moedersinstink is vir my nie,” sê sy. “Dié meisies is my grootste, diepste vreugde.”
Oprah, wat in Mississippi in armoede deur haar ouma grootgemaak is, sê sy wou vir meisies soos sy ’n skool bou. “Die skool is my grootste nalatenskap.”
Thando maak nou self naam in die vermaakbedryf: Sy werk by Entertainment
Tonight as ’n vervaardiger van die Amerikaanse televisienetwerk se stroomkanaal ET Live.
“Dis baie opwindend,” sê sy. “Dit kan intimiderend wees om as buitestander in ’n plek in te stap saam met mense wat dalk anders as jy is. En dikwels is ek ook die jongste, maar, haai, ons is dapper en vol durf, gemaklik in ons eie vel en lief daarvoor.
“Ons doen dit vir onsself, ons familie en mense wat ons verteenwoordig.”
Thando besef niks hiervan sou sonder haar Mam’ O moontlik gewees het nie. “Ek is haar soveel verskuldig,” sê sy.
AS KIND het Thando elke dag saam met haar ouma Janet Tshabalala The Oprah Winfrey Show gekyk. Sy onthou sy was behoorlik deur dié “pragtige en talentvolle mens” betower.
Min het sy toe geweet sy sou haar heldin eendag ontmoet.
Thando was 12 jaar oud toe die oproep kom wat haar lewe verander het: Oprah het haar ’n plek aangebied in die skool wat sy begin het om akademies begaafde kinders uit agtergeblewe agtergronde te help.
Nadat die televisiemagnaat iets spesiaals in haar raakgesien het, was die blinkoog-Thando in 2007 onder die eerste groep leerders in die skool.
“Oprah het my gebel en gesê: ‘Jy het die paal gehaal!’ ” vertel sy.
Thando is grotendeels deur haar ouma, ’n huiswerker, in ’n beskeie huis in Northmead, Benoni, grootgemaak.
Oprah het in 2006 na die huis gekom terwyl sy die dokumentêr Building a Dream voor die opening van haar skool verfilm het.
“Ek onthou hoe sy in my kamer, wat letterlik die grootte van my enkelbed was, ingestap en gesê het: ‘Dit is ’n boot, so klein is dit.’ ”
Sy onthou haar eerste weke aan Oprah se splinternuwe akademie met sy glansende, moderne geriewe en weelderige verblyfplek.
“Dit was soos om by jou ryk tante te gaan kuier,” sê sy. “Maar wat my die meeste getref het, was al die liefde wat Oprah daarin gesit het.
“Sy het aan die fynste besonderhede aandag gegee en vir ons alles van die beste gegee, van linne tot eetgerei. Sy het gesê sy wou vir ons gee wat sy vir haarself sou gee. Sy het vir ons gesê: ‘Skoonheid is inspirerend.’ ”
Die twee het ál meer geheg geraak aan mekaar, veral nadat Thando haar ma, Elizabeth, in 2010 weens vigs verloor het.
“My ma was soos my beste vriendin. Sy het dikwels vir my kom kuier. Sy en my pa was baie jonk toe ek gebore is; daarom het my ouma toe aangebied om my groot te maak.
“My pa (wat in 2017 aan meningitis dood is) het in ’n ander provinsie gewoon en ek het nie ’n hegte verhouding met hom gehad nie.”
Ten spyte van die hartseer het Thando op skool volhard en ’n jaar later haar matrieksertifikaat van Mam’ O ontvang.
THANDO is steeds na aan haar ouma en sy doen haar bes om haar so gereeld te sien as wat haar bedrywige lewe dit toelaat.
Sy het in Desember huis toe gevlieg om haar ouma se verjaardag te kom vier. In ’n treffende huldeblyk op Instagram beskryf sy haar ouma as “die slagaar van my bestaan” en “die uiterste vorm van liefde wat God nog vir my gewys het.
“Ek is nog ’n jaar dankbaar om dieselfde pad as hierdie juweel te loop; sy is my beste vriendin en vennoot in armoede,” skryf sy.
“Ons het dit saam deurgemaak. Sy het my geleer om sag met ander te wees, om gelukkig te wees sonder om daaroor skuldig te voel, om ander beter te laat as wat ek hulle gekry het. Ek bid sy leef lank genoeg om nog baie kere saam met my in die paadjie van sukses af te stap.”
Die grootste les wat sy by haar tweede ma, Oprah, geleer het, is om die geleentheid aan te gryp om ’n suksesvolle swart vrou te wees en daardie boodskap van bemagtiging te deel.
Thando is vurig trots op haar SuidAfrikaanse wortels en vol geesdrif om die wêreld bewus te maak van haar geboorteland en sy mense.
By die Black Entertainment Awards verlede jaar het sy aan ’n paneelbespreking oor Nelson Mandela se nalatenskap deelgeneem. En in September het sy in New York by die Verenigde Nasies gepraat oor die kwessie van die besit en prioritisering van Afrikakuns.
“Op die oomblik probeer ek om daad by die woord te voeg. Ja, ek vind nog my voete, maar ek leef doelgerig en ek hoop dit inspireer jong meisies om groot te droom.
“Oor ’n paar jaar is ek terug by die huis en ek wil sentrums open vir vroue wat soos ek lyk en die goeie boodskap deel dat hoop nie verlore is nie en dat ons pyn soms ons grootste krag is. Dit maak ons beter mense.”
In die People TV-dokumentêr sê Oprah sy het net een agenda vir meisies soos Thando: om sukses te behaal in wat hulle ook al vir hulself kies.
“Opgevoede jong vroue soos dié is die toekomstige leiers van Afrika.”