Kook so met wyn
Wyn is meer as net ’ n pasmaat saam met kos; dit geur, rond af en kan selfs as marinade ingespan word
WYN kan die smaak en aroma van kos versterk, verbeter en beklemtoon. Pleks van die geur verbloem van dit wat jy kook, bou dit eerder daarop voort. Hier gebruik ons vyf verskillende wyne om heerlike geregte mee op te tower.
SAUVIGNON BLANC GNOCCHI MET SAMPIOENE EN FETAKAAS
GENOEG VIR 4-6 MENSE BEREIDING: 10 MIN. GAARMAAK: 15-20 MIN.
500 g aartap-pelgnocchi
30 ml (2 e) botter
120 g sj i i take sampioene, grofgekap
250 g wit knopiesampioene, grofgekap
2 knoffelhuisies, fyngemaal
160 ml (²⁄₃ k) witwyn soos sauvignon blanc
VIR VOORSIT
1-2 wiele fetakaas, gekrummel
’n handvol plat blaar-pietersielie, gekap
1 Bring water tot kookpunt in’ n middelslag kastrol. Voeg die gnocchi by en kook volgens die aanwysings op die verpakking. Dreineer en hou eenkant. Behou sowat 250 ml (1 k) van die gnocchiwater.
2 Smelt die botter in ’n groot pan oor matige hitte. Voeg die sampioene by die botter en roerbraai 5 min. tot bruin. Voeg die knoffel by en braai nog 1 min.
3 Giet die wyn by en laat prut 3-4 min. tot die wyn amper verdamp, maar daar nog vloeistof oor is. Voeg die gnocchi by, roer liggies en laat prut nog 5-7 min. tot die gnocchi effens verkleur. Voeg van die gnocchiwater bietjies-bietjies in die pan. Hou aan met roer tot die gnocchi romerig lyk.
4 Vir voorsit Verwyder die pan van die hitte, strooi die feta en pietersielie oor en sit voor.
CABERNET SAUVIGNON FRIKKADELLE MET PASTA
GENOEG VIR 4-6 MENSE BEREIDING: 20 MIN. GAARMAAK: 35-40 MIN.
SOUS
45 ml (3 e) olyfolie
1 groot ui, gekap
1 rooi brandrissie, fyngekap
2 knoffelhuisies, fyngekap
1 rooi soetrissie, in blokkies gesny
125 ml (½ k) beesvleisaftreksel
250 ml (1 k) rooiwyn soos cabernet sauvignon
2 x 410 g-blikke gekapte tamaties
15 ml (1 e) tamatiepasta
30 ml (2 e) suiker
1 lourierblaar
’n hand vol vars basilieblare, gekap
sout en vars gemaalde swartpeper
FRIKKADELLE
500 g beesmaalvleis
1 eier, geklits
45 ml (3 e) broodkrummels
10 ml (2 t) komyn
sout en vars gemaalde swartpeper
PASTA
250 g tagliatelle
1 Sous Verhit die olie in ’n groot swaarboomkastrol en roerbraai die ui 5 min. oor matige hitte tot effens bruin. Voeg die brandrissie, knoffel en soetrissie by en roerbraai nog 2 min. Verhoog die hitte en giet die aftreksel en wyn by. Laat kook 5 min. voor jy die tamaties en tamatiepasta byvoeg. Verlaag die hitte en voeg die suiker en lourierblaar by. Bedek en laat prut 2-3 min. Voeg die basilie by en geur met die sout en peper. Skakel die hitte af.
2 Frikkadelle Meng die bestanddele en rol in okkerneut grootte balle. Braai die frikkadelle 10 min. of tot bruin, en draai dit halfpad deur om. Plaas die frikkadelle saam met die tamatiesous in die kastrol en laat prut 20 min.
3 Pasta Kook die pasta volgens die aanwysings op die verpakking. Giet die sous oor die pasta en sit voor saam met ekstra vars basilieblare.
CHARDONNAY KRUIE-EN-WYNVARK MET GEBRAAIDE AARTAPPELWIGGIES
GENOEG VIR 4 MENSE BEREIDING: 10 MIN. GAARMAAK: 30 MIN.
45 ml (3 e) olyfolie
4-5 knoffelhuisies, in dun skywe gesny
2 takkies vars roosmaryn, gekap
10 g vars salie, grofgekap
500-600 g varktjops of varkribo-ogsteaks
310 ml (1¼ k) droë witwyn soos ’n effens gehoute chardonnay sout en vars gemaalde swartpeper
125 ml (½ k) hoenderaftreksel
125 ml (½ k) dubbelr-oomjogurt
VIR VOORSIT
gebraaide aartappelwiggies
1 Verhit die olie in ’n groot kastrol en braai die knoffel, roosmaryn en salie 1 min. oor matige hitte.
2 Plaas die varkvleis in die kastrol deur dit versigtig op die kruie te plaas en braai sowat 5 min. aan weerskante. Haal die vleis uit en hou eenkant.
3 Giet 250 ml (1 k) wyn in die kastrol, skraap die bodem van die pan, verlaag die hitte en laat prut 1-2 min.
4 Plaas die vleis terug in die kastrol en geur met die sout en peper. Maak gedeeltelik met ’n deksel toe en laat kook sowat 15-20 min. Draai die vleis een keer om en maak seker daar is genoeg vloeistof in die pan. Voeg 250375 ml (1-1½ k) kook- water bietjies-bietjies by, indien nodig. Wanneer die varkvleis sag en sappig is, haal dit uit die kastrol en hou eenkant in aluminiumfoelie om warm te hou.
5 Verhoog die hitte . Giet die oorskietwyn en aftreksel in die kastrol, skraap weer die bodem en laat prut tot die vloeistof met die helfte afgekook het. Voeg die jogurt by. Los die kastrol op die stoof, maar skakel die hitte af. Geur met nog sout en peper, indien nodig.
6 Vir voorsit Sny die vleis in skywe, giet die sous oor en sit voor saam met die gebraaide aartappelwiggies.
CHENIN BLANC HOENDER-EN-PEERSLAAI MET WITWYNSOUS
GENOEG VIR 4-6 MENSE BEREIDING: 15 MIN. GAARMAAK: 20 MIN.
HOENDER
2 hoenderborsfilette sout en peper olyfolie SLAAISOUS
125 ml (½ k) witwyn soos chenin blanc, ’n vrugtige witwyn
2 sprietuie, gekap
1 knoffelhuisie, fyngemaal
’n paar vars ment- en pietersielie blare, gekap
60 ml (¼ k) peersap
80 ml ( k) olyfolie sout en vars gemaalde swartpeper AFRONDING
100-200 g baba spinasieblare
60 g droë bosbessies
3 pere, in skywe gesny
100 g bokkaas, in skywe gesny
50 g pampoenpitte, gerooster
Voorverhit die oond tot 180 °C.
1 Hoender Plaas die hoender op ’n bakplaat, geur met die sout en peper en bedruip met die olyfolie. Bak 20 min. tot gaar en bruin. Haal uit en hou eenkant.
2 Slaaisous Giet die wyn in ’n klein kastrol en laat kook sowat 2-3 min. oor hoë hitte sodat die alkohol weggekook is. Giet in ’n beker of fles en laat afkoel. Voeg die res van die bestanddele by en klits tot goed gemeng. Geur met die sout en peper.
3 Afronding Strooi die spinasieblare op ’n plat opdienbord gevolg deur die bosbessies. Pluis die hoender en pak op die bord uit. Pak die pere tussenin gevolg deur die kaas en pampoenpitte. Giet die slaaisous oor net voor jy dit voorsit.
MERLOT ETON MESS
LEWER GENOEG VIR 6 GLASE BEREIDING: 20 MIN. GAARMAAK: 1 UUR
WYNSTROOP
250 ml (1 k) rooiwyn soos merlot
125 ml (½ k) suiker
10 ml (2 t) suurlemoensap
2 tiemietakkies MERINGUES
3 eierwitte ’n knippie sout
125 ml (½ k) strooisuiker
80 ml ( k) versiersuiker, gesif
10 ml (2 t) mielieblom ROOM
250 ml (1 k) room, geklits
250 g roomkaas
125 ml (½ k) versiersuiker, gesif
5 ml (1 t) vanieljegeursel
300-500 g rooi- en swartdruiwe, gehalveer
Voorverhit die oond tot 120 °C. Voer ’n bakplaat met bakpapier uit en bestrooi met mielieblom.
1 Wynstroop Giet die wyn in ’n middels-lagkastrol en plaas oor matige hitte. Voeg die suiker en suurlemoensap by en roer. Bring die mengsel tot ’n vinnige prut en laat kook 10-12 min. Hou aan met roer tot die stroop effens verdik het en die agterkant van ’n houtlepel be- dek. Verwyder van die hitte, voeg die tiemietakkies by en laat trek 10 min. eenkant. Die mengsel sal taamlik loperig wees, maar dit sal effens verdik namate dit afkoel. Verwyder die tiemietakkies.
2 Meringues Klits die eierwitte en sout saam tot stywe punte vorm. Voeg die strooisuiker geleidelik by en klits saam tot dik en glansend. Sif die versiersuiker en mielieblom oor. Vou om te meng en skep hopies van die mengsel op die bakplate. Bak die meringues 1 uur of tot dit maklik van die bakpapier af lig en bros is, maar nie bruin nie. Skakel die oond af en los die meringues binne tot dit heeltemal afgekoel is.
3 Room Klits die room, roomkaas, versiersuiker en vanielje saam in ’n groot bak tot sagte punte vorm. Verdeel ’n kwart van die druiwe tussen 6 glase. Skep van die roommengsel oor en krummel van die meringues grof bo-oor. Herhaal met die res van die bestanddele.
4 Strooi die oorblywende druiwe oor en bedruip met die wynstroop.