LEEUAPIES, BRASILIË

’n Nuwe brug wat in Brasilië gebou word, is goeie nuus vir leeuapies, wat net in klein stukkies reënwoud in dié land voorkom. Daar is min van hulle oor, want ontwikkeling en landbou het groot dele van hul habitat vernietig en mense het hulle as troeteldiere verkoop. Die brug gaan stukkies woud weerskante van ’n groot pad verbind. Groepe apies wat aan verskillende kante bly, kan so by mekaar uitkom. Daar is dus meer paarmaats, wat hul bevolking kan laat groei.