LIEWE MATRIEKS . . .
Vir die gr. 12’s wat terugkeer skool toe wag ongekende uitdagings – maar dis ’n vuurdoop vir die lewe, skryf ’n predikant
TEL jou voor jy stap eendag in jou matriekjaar uit jou klaskamer . . . en meer as twee maande lank mag jy nie terugkeer nie.
Byna ’n hele kwartaal lank sien jy nie jou onderSwysers,
vriende of selfs jou skoolkys van aangesig tot aangesig nie. Geen saalbyeenkomste of kletspraatjies met pouse nie en geen sport of debatgroep nie.
Dan keer jy op ’n dag terug – maar dit is ’n vreemde leeromgewing wat jou nou in die era van COVID-19 begroet. Soveel bekende en beminde dinge is weg: high fives; styf teen mekaar ingeryg sit in die wintersonnetjie, hand-om-die-lyf-spanfoto’s; bondeltjies maak vir sportkrete.
In die plek daarvan is gesigmaskers en handreinigers, lessenaars wat 2 m van mekaar staan en merke op die sementstoep wat toustanery reguleer. ’n Plek van samehorigheid is nou ’n wêreld van sosiale afstand.
Dit is wat op Suid-Afrikaanse leerders wag wanneer die skoolklok weer lui – volgens Angie Motshekga, die nasionale onderwysminister, op 1 Junie vir die eerste groep. Van ’n kleurryke vloed deur die skoolhekke sal daar geen sprake wees nie, want aanvanklik sal net gr. 12’s en gr. 7’s – laasgenoemde ook in ’n belangrike oorgangsjaar – skool toe gaan.
Ander grade se leerders sal nog ’n ruk tuisonderrig kry en eers gaandeweg kan terugkeer skool toe namate die inperking verslap word.
Vanjaar se matrieks sal ongekende ontwrigting en druk moet oorkom. Die leerplan moet nou in veel minder tyd baasgeraak word. Daar is sprake van ekstra klasse oor naweke en korter vakansies.
En ten spyte van die streng veiligheidsmaatreëls om die virus uit die klaskamer te hou is die gevaar van COVID-19 alomteenwoordig.
Boonop sal daar waarskynlik nie sprake wees van daardie laaste mylpale in die matriekjaar nie: die matriekafskeid, laaste prysuitdeling, 40 days.
Maar uit hierdie skooldae van vrees, onsekerheid en bloedsweet kan ook goeie en unieke dinge kom, skryf ds. Rudi Swanepoel van die NG gemeente Andrew Murray in Johannesburg in ’n ope brief aan die nasionale matriekklas van 2020.
Hier is sy boodskap van bemoediging.