VIR LEDE VAN PENSIOEN- EN VOORSORGFONDSE

As jou maatskappy tot ’n sambreelpensioen of -voorsorgfonds behoort, is jou belegging beskerm. Met sambreelfondse dra verskillende maatskappye by tot een pensioen- of voorsorgfonds. Die fonds het standaardreëls vir alle maatskappye en word onafhanklik van jou werkgewer bestuur.

Al is jou werk se aftreefonds nie deel van die sambreelfonds nie, moet dit aan wetgewing voldoen. Die pensioenbydrae wat maandeliks van jou salaris afgetrek word, word deur jou werkgewer aan die fonds betaal. Jou werkgewer mag wetlik nie aan jou spaargeld in daardie fonds raak nie.

Aftreebydraes word meestal op die volgende maniere hanteer as werkgewers weens die COVID-19-pandemie nie die mas kan opkom om werknemers se salarisse of aftreebydraes te betaal nie:

As jy nie ’n salaris kry nie, word daar nie van jou verwag om tot jou aftreefonds by te dra nie. Daar kan steeds fooie van jou belegging afgetrek word. Jy kan die bydrae ná ’n tydperk, byvoorbeeld drie maande, hervat. Jou werk moet alle toepaslike inligting verskaf.

Jou pensioengewende salaris is gevolglik kleiner en ook jou maandelikse bydrae tot die aftreefonds. Maar dit word nie gestaak nie. (Sien kassie.)

Jou maatskappy kan aansoek doen om sý deel van jou maandelikse pensioenbydrae (byvoorbeeld

R1 000) te staak. Dan sal net jou maandelikse deel (byvoorbeeld R500) betaal word. Dus sal jou totale maandelikse pensioenbydrae nou R500 wees pleks van R1 500. As jou werkgewer dit doen, sal hulle vir jou presies moet verduidelik wat die uitwerking op jou vergoedingspakket en jou aftreebelegging sal wees.

Jy het gewoonlik drie keuses:

■ Onttrek van die geld soos jy kragtens die wet toegelaat word; ■ los die belegging in die aftreefonds sodat dit daar bly groei; of

■ plaas dit oor na ’n voorsorgfonds.

Vra altyd eers ’n onafhanklike finansiële beplanner om na jou hele finansiële prentjie te kyk sodat jy die beste besluit kan neem.