BAANBREKERS IN DIE RUIMTE

Bob Behnken en Doug Hurley is al jare lank vriende. Albei is voormalige militêre vlieëniers wat later tot die rang van kolonel bevorder is – Doug in die Amerikaanse marienekorps en Bob in die lugmag.

Bob, wat ’n doktorsgraad in fisika aan die California Institute of Technology (bekend as Caltech) behaal het, was eers ’n toetsvlieënier, maar het later as ingenieur gekwalifiseer. Hy is in 2000 met sy eerste poging vir Nasa se ruimtevaardersklas aanvaar – nes Doug in dieselfde jaar. Dié was in sy 24 jaar in die Amerikaanse marienekorps eers ’n toetsvliënier en later vegvlieënier. Doug het ’n graad in siviele ingenieurswese aan die Tulane-universiteit in New Orleans, Louisiana, verwerf.

Bob se vrou, Megan McArthur (48), is ’n Nasaruimtevaarder en oseanograaf. Doug se vrou, Karen Nyberg (50), het onlangs uit die Nasa-ruimtevaarderskorps uitgetree.

Die twee baanbrekers is meer as twee jaar lank vir die geskiedkundige sending opgelei en moes twee weke voor die lansering in kwarantyn deurbring – protokol om te verhoed dat ruimtevaarders virusse saam met hulle na die Internasionale Ruimtestasie neem. Op die ruimtestasie sal hulle met navorsingswerk besig wees. Dis soos ’n enorme laboratorium wat om die aarde wentel en waar duisende eksperimente al sedert 2000 uitgevoer is – onder meer oor hoe die menslike liggaam in die ruimte aanpas en hoe plante daar groei.