MY STORIE
Leser se wekroep aan die wêreld: Kyk asseblief mooi na jul troeteldiere
VROEGOGGEND lui my foon. Dis die veearts. Hulle het alles moontlik gedoen, maar Max, my geliefde Jack Russell, is weg. My lewe stort in duie.
Maxy, jy was ’n wonderlike hondeseuntjie. Ek gaan jou asempie in my nek mis. Ek het altyd so veilig gevoel met jou by my voete. Jy was my beskermengel, my mentor, my beste vriend; jy het altyd my hartseer verdryf. Jy het so skielik siek geword, ek kon nie glo jy het ophou met veg nie. Rus in vrede, my liewe Maxy.
Ek glo almal moet ’n hondekind hê. Dis een van die kosbaarste en vreugdevolste besittings. Tog sien ek gereeld brandmaer honde wat met toue of kettings vasgemaak is.
Ek wil die ganse wêreld versoek: Kyk mooi na jul hondekinders. Hulle verdien spesiale aandag, want honde was al soveel keer die beskermengele en ’n uitkoms vir bejaardes of selfs klein kinders.
As jou pad met dié van ’n vermaerde en verwaarloosde hondekind s’n kruis, neem hom of haar na die Dierebeskermingsvereniging indien moontlik. Of koop ’n sak hondekos en lewer dit by ’n skuiling vir honde af.
Ek het besluit om meer vir die Dierebeskermingsvereniging te doen. Hierdie mense verrig wonderlike en onbaatsugtige werk. Hul lewens draai om die versorging van en liefde vir diere, en hulle red dikwels dié diere se lewe.
Ons as die gemeenskap moet ook ons kant bring om hulle in hul liefdeswerk te steun. Neem asseblief een van die honde by hierdie skuilings aan en gee aan hulle ’n liefdevolle huis.
So wen jy ’n vriend vir ewig en die lojaalste metgesel wat jy maar kan hê.