BOOGSKUTTERS EN SOSIALE MEDIA
’n Boogskutter is ’n ope boek op sosiale media. Boogskutters hou daarvan om wyshede te deel, al is dit sentimenteel. ’n Boogskutter se profielfoto’s stel hul breë glimlag ten toon. Hulle hou van blogs, twiets en webtuistes oor reis.
Hul inskrywings is gereeld en op datum.
Boogskutters volg graag inspirerende stories en mense.
Vir die optimistiese Boogskutter is internetafsprake groot pret.
LEEU
22 JUL – 22 AUG
Jou huis is vandeesweek vir jou allerbelangrik; as daar geleenthede opduik wat jou toelaat om meer tyd as gewoonlik tuis deur te bring, moenie twee keer dink oor waar jou fokus moet wees nie. Dit lyk asof die huishoudelike begroting vir ’n slag bestendig is en dat jy en jou maat ooreenstem oor hoe die begroting bestuur moet word. Vier dit.
GELUKKIGE NOMMERS 6, 46, 37, 16, 2, 11
MAAGD
23 AUG – 22 SEP
Jy en jou geliefde sal dalk tot jul verbasing besef dis sowaar moontlik om op ’n gelukkige en harmonieuse manier met mekaar oor die weg te kom. Maak dit vandeesweek jou doelwit. Pleks daarvan om jou liefdeslewe met jou tipiese kritiese Maagd-oog te beskou, neem ’n buigsamer ingesteldheid aan. Dit sal vir jul albei ’n groot verskil maak. GELUKKIGE NOMMERS 23, 50, 42, 14, 11, 5
WEEGSKAAL
23 SEP – 22 OKT
Dinge lyk vandeesweek belowend wat jou liefdeslewe en jou geldsake betref. Doen jou bes om te waardeer wat jy het, en smoor die neiging om altyd meer te wil hê in die kiem voor dit ’n probleem word. Dit is in jou hande om ’n gevoel van balans en bevrediging met jou omstandighede te skep sonder om noodwendig jou ambisies prys te gee. GELUKKIGE NOMMERS
5, 25, 47, 31, 32, 23
SKERPIOEN
23 OKT – 21 NOV
Met die liefdesdiva, Venus, wat jou teken betree en in harmonie is met die dromerige Neptunus, is alles in plek vir ’n romantiese week. Neem die inisiatief om vir jou geliefde ’n verrassing te beplan wat nie peperduur is nie. Dis mos die gedagte wat tel . . . Vir enkellopende Skerpioene is dit ’n uitstekende tyd om te ontspan of op ’n afspraak te gaan. GELUKKIGE NOMMERS 26, 51, 28, 42, 20, 50