Greta Thunberg rig haar blik op die kosbedryf
DIE jong Sweedse aktivis Greta Thunberg inspireer en leer nou al ’n goeie klompie jare mense reg oor die wêreld oor die klimaatskrisis. Nou het sy begin om bewustheid te skep oor praktyke in die kosbedryf.
Haar nuwe fokus is op die manier waarop ons kos vervaardig, voorberei en eet. Greta glo so ’n holistiese benadering (sien Woord van die
Week) sal ’n invloed hê op baie probleme wat ons ervaar, soos die uitbreek van pandemies, wreedheid teenoor diere en die vrystel van koolstof in die atmosfeer.
“Die klimaatskrisis, ekologiese krisis en gesondheidskrisis, hulle is almal verwant aan mekaar,” het sy aanlyn gesê. Sy glo ons kan tonne minder koolstofdioksied en metaan vrystel as die mensdom meer plantgebaseerde kos soos groente, vrugte, neute en sade eet.
Die manier waarop mense die natuur mishandel, skep die perfekte toestand vir siektes om van een dierspesie na ’n ander te versprei – en eindelik na ons toe, sê Greta. “Miljoene is al dood aan covid, zika, ebola, wesnylvirus, SARS, MERS en MIV-vigs.”
Studies wys baie van die aansteeklike siektes wat tussen 1990 en 2004 onder mense ontdek is, kom van diere af. “As ons aangaan om kos op dieselfde manier te bly vervaardig, gaan ons die habitatte van die meeste wilde plante en diere heeltemal uitwis en talle spesies laat uitsterf. Hulle is ons lewensondersteuningstelsel; as ons hulle verloor, is ons ook verlore,” sê sy.
Hoe het Greta 'n aktivis geraak?
Greta kom van Stockholm in Swede en het op agt begin leer oor die klimaatskrisis. Teen 15 het sy ’n protesbeweging begin waarmee sy die regering gevra het om veranderings te maak aan die manier waarop hulle tot aardverhitting bydra.
Haar poging het baie steun gekry toe video’s van haar internetberoemd geraak het. Sy het die #FridaysForFuture-beweging begin. Dis ’n internasionale projek waar skoolkinders elke Vrydag klasse los en liewer aan betogings deelneem om politici te dwing om iets te doen omtrent die klimaatskrisis. Sy het tieners aangemoedig om hul stem te gebruik om aandag te trek na die lot van ons planeet.
As kind het Greta gehoor sy het aspergersindroom – dis ’n vorm van hoogfunksionerende outisme. Sy laat egter nie toe dat dit haar beperk nie en sê net dis haar superkrag.