DIS NET SEEMONSTERS WAAR JY KYK

Disney en Pixar stel ons nooit teleur wat animasieflieks betref nie. Dink net aan Onward en Soul, wat onlangs ’n Oscar vir beste animasiefliek gewen het. Nou is hulle terug met nog nuwe kykgenot – Luca! Hier is alles wat jy oor die fliek moet weet.

WAAROOR GAAN DIT?

Dis ’n oulike verhaal oor vriendskap wat jou hart warm gaan maak. Dit gaan oor twee tienerseemonsters wat uit hul gemaksone kom en ’n somer beleef wat hul hele lewe verander. “Die fliek gaan oor die vriendskappe wat ons verander,” sê die regisseur, Enrico Casarosa. Hy beskryf die animasiefliek as ’n “liefdesbrief” aan ons elkeen se vormingsjare.

WIE IS LUCA?

“Luca is ’n skaam, gawe introvert wat altyd die reëls volg. Maar hy het ’n geheime begeerte om die wêreld te sien en alles te leer ken,” sê die draaiboekskrywer, Jesse Andrews. “Hy moes sy lewe lank hoor dat seemonsters nooit bo die wateroppervlak moet gaan waar interessante dinge gebeur nie.” Hy ontmoet dan die seemonster Alberto. Dié weet alles van wat op die aarde aangaan, en Luca is mal oor al die ongelooflike en interessante stories wat hy vir hom vertel. “Alberto sleep Luca letterlik uit die water, en ons ontdek dat seemonsters die magiese vermoë het om in mense te te verander wanneer hulle droog is,” sê Enrico.

DIE STEMME VAN DIE SEEMONSTERS

Jacob Tremblay (14) is Luca se stem en Jack Dylan Grazer (17) is die stem van Alberto. Dis die eerste keer dat hulle rolle in ’n animasiefliek vertolk.