WAT KAN JY DOEN?
Hoe gemaak as jy ontevrede is oor Buurman se bouwerk?
Die reg met betrekking tot bouwerk en dispute met jou buurman is ingewikkeld en hang af van die feite in elke saak, sê Nikki Malan, ’n spesialis in eiendomswetgewing van DHM Prokureurs in Kaapstad.
“My raad is om eers ’n gesprek met jou buurman te hê, en wanneer dit nie oplossings bied nie regsadvies in te win.”
Dis onwaarskynlik dat die munisipaliteit aan jou inligting sal gee oor iets waarvan jy nie ’n party is nie. “Om met die beplanningsafdeling oor die bouplanne te praat sal nie jou probleem oplos nie, want die munisipaliteit kan nie net die goedkeuring vir ’n bouplan omkeer nie. Dikwels is jou enigste roete om formele regstappe te doen as die bouplanne eers goedgekeur is,” sê Nikki.
Chris Stofberg, van Stofberg & Bekker in Kaapstad, sê jy moet kyk na die bouregulasies in jou gebied om te sien of jy regsgronde het om kapsie te maak. Die algemeenste redes wat hy teëkom, is:
■ Verdigting van die eiendom:
Wanneer mense bykomende huise op die erf bou.
■ Waar die aanbouing jou privaatheid raak.
■ Wanneer jou huis se uitsig belemmer word.
■ Waar die huis nie by die omgewing inpas nie en volgens die klaer eiendomswaardes in die buurt verlaag.
Nikki sê ’n bouplan kan net afgekeur word op grond van wat die Wet op Nasionale Bouregulasies en -standaarde uiteensit. Dit sluit munisipale wetgewing en die sonering van die eiendom in.