BBQ-VARKNEKTJOPS MET UIE-BIERBROOD
Ontbeende of selfs varknektjops met die been kan gebruik word vir hierdie resep. Hierdie marinade verseker dat die tjops lekker sag en sappig bly.
GENOEG VIR 4-6 MENSE BEREIDING: 15 MIN. MARINEER: 1 UUR OF OORNAG GAARMAAK: 45-50 MIN.
TJOPS
6 varknektjops 60 ml (¼ k) elk tamatiesous en bruinsuiker
30 ml (2 e) worcestersous 30 ml (2 e) asyn 2 knoffelhuisies, fyngedruk BIERBROOD
15 ml (1 e) olie
1 ui, gekap
500 ml (2 k) bruismeel
5 ml (1 t) elk droë tiemie en sout
2 stingeluie, fyngekap 250 ml (1 k) gerasperde cheddar
1 x 340 ml-blik/bottel bier 2 stingeluie, in lang repe gesny
VIR VOORSIT
sout, na smaak botter, vir smeer
Maak ’n vuur met genoeg kole vir braai, sit ’n staander in die kole en hou ’n toeknyprooster byderhand. Voorverhit die oond tot 180 °C en bespuit ’n middelslagbroodpan of blikbord met kossproei.
1 Tjops Pak die tjops in ’n marineerbak. Sit die res van die bestanddele saam in ’n klein kastrol en verhit tot die suiker gesmelt is. Laat afkoel en giet oor die tjops. Maak seker die tjops is oral bedek. Laat minstens ’n uur of oornag in die yskas marineer.
2 Bierbrood Verhit die olie in ’n pan en braai die ui tot goudbruin. Meng die meel, tiemie, sout, fyngekapte stingeluie en die helfte van die cheddar goed.
3 Giet die bier by en meng tot ’n beslag vorm. Voeg die uie by en meng goed. Skep die beslag in die bereide broodpan of blikbord.
4 Sprinkel die res van die kaas oor en pak die repe stingeluie bo-op. Bak 40-45 min. of tot gaar en
tot ’n toetspen skoon uit die middel van die brood kom.
5 Vir voorsit Haal die tjops uit die marinade en pak op die rooster. Braai 15-20 min. oor matige kole of tot die tjops gaar is soos verkies. Smeer gereeld nog van die marinade oor as die tjops te vinnig droogbraai. Geur met die sout.
6 Keer die brood uit en sny in skywe, smeer met die botter en sit voor saam met die tjops.