VARKLENDETJOPS MET ROMERIGE KNOFFELKAPOKAARTAPPELS EN GEBRAAIDE APPELS
Die swoerd aan varklendetjops raak dikwels taai as dit oor die kole gebraai word. Ons sny die swoerd af en rooster dit tot bros in die oond en braai die tjops met ’n mosterdsmeersel oor kole.
GENOEG VIR 4-6 MENSE BEREIDING: 15 MIN. MARINEER: 1 UUR
GAARMAAK: 30 MIN.
4-6 varklendetjops met die swoerd aan
10 ml (2 t) seesout
1 heel knoffelbol
15 ml (1 e) Dijonmosterd 15 ml (1 e) heuning KAPOKAARTAPPELS
8 aartappels, geskil en in kwarte gesny
45 ml (3 e) botter
30 ml (2 e) room of melk sout, na smaak
VIR VOORSIT
2 Granny Smith-appels, gehalveer
15 ml (1 e) olyfolie
15 ml (1 e) heuning
Voorverhit die oond tot 200 °C. Sit ’n draadrakkie op ’n bakplaat en bespuit met kossproei. Maak ’n vuur met genoeg kole vir braai. Sit ’n staander in die kole en hou ’n toeknyprooster byderhand.
1 Sny die swoerd van die tjops af – sorg dat daar nog ’n klein lagie vet aan die tjops is, maar geen vleis aan die swoerd nie. 2 Pak die swoerd met die vetkant na onder op die draadrakkie en sprinkel die helfte van die sout oor. Draai die heel knoffelbol met foelie toe en sit dit langs die swoerd op die draadrakkie. 3 Rooster 25-30 min. of tot die swoerd goudbruin en bros is en die knoffel sag. Hou eenkant en laat die knoffel afkoel.
4 Meng die mosterd en heuning goed en smeer oor die tjops. Geur met die orige sout. Pak die tjops op die rooster en braai 12-15 min. oor die kole of tot gaar soos verkies.
5 Kapokaartappels Kook die aartappels in water tot sag, dreineer en druk rofweg fyn. Druk die sagte knoffel uit die huisies en voeg by die aartappels.
6 Voeg die res van die bestanddele by en druk nog fyn tot glad.
7 Vir voorsit Smeer die appels met die olie en braai oor die kole tot lig geskroei. Drup die heuning oor.
8 Breek die bros swoerd in stukkies. Sit die tjops voor saam met die knoffelkapokaartappels, gebraaide appels, bros swoerd en vars kruie, indien verkies.