Op ons speellys
Dié luisterlys bevat alles van rap tot iets anders vir die hart
JONG GROTES BIGGY
Sy naam is Adrianus, en te danke aan sy oornagroem weet almal dit – nie net die vroue en die neighbours nie.
Adrian Entwistle, beter bekend as Biggy, sy verhoognaam, is terug met ’n splinternuwe album, Jong Grotes. Die album het 16 nuwe snitte.
Aanhangers van sy tong-in-die-kies raplirieke en aansteeklike ritmes sal nie teleurgesteld wees nie en sal aanklank vind by liedjies soos “Jong Grotes”, “Boet en Saartjie” en die enkelsnit “Peanut butter” saam met Early B en beatsbyhand. Die album se titel is ’n bynaam wat een van Biggy se vriende vir hom gegee het.
“Die een dag in 2019 toe ons by die Universal-platemaatskappy is, toe teken ek ‘Biggy, Jong Grotes’ op die deur in die studio waar baie ander kunstenaars al hul name geteken het,” vertel Biggy (25). Dit was eers heelwat later dat hy besluit het om dié album so te doop.
Die album het ’n hele paar indrukwekkende samewerkings met onder andere Loufi, Bouwer Bosch en GBOY.
“Al die musikante wat saam met my op die album is, is spesiaal. Maar dit is veral my liedjies saam met Jack Parow (“Funky”) en YoungstaCPT (“Playa”) wat ek lankal wou hê moet gebeur,” vertel Biggy, ’n boorling van Gqeberha (voorheen Port Elizabeth) wat deesdae in Johannesburg woon.
“Dit is ook vir my baie spesiaal om ’n
beautiful liedjie saam met Stilo Magolide op die album te hê, want ons is nie kunstenaars wat jy regtig verwag saam sal werk nie. Maar nou smelt ons fanbases saam, wat regtig cool is,” sê hy.