ARMER VRIENDE VERWAG HULP
‘DIS NIE LIEFDESGEBARE NIE, DIS NET ’N STUKKIE GEREEDSKAP WAARMEE HY JOU WIL BEHEER’ – ELIZE
V
Ons het pas afgetree en het genoeg om van te leef. Van ons vriende en kennisse ly finansiële gebrek en kry ook emosioneel swaar. Hoe behou ons die vriendskappe sonder dat die geldkwessie ’n negatiewe rol speel? Ons kan nie almal in finansiële nood help nie. Mater op K
A
Daar is talle maniere om ander te help wat nie geld behels nie, maar hierdie hulp sal julle vertroulik en onvoorwaardelik moet verleen terwyl julle altyd die ander mens se waardigheid in ag neem:
■ Gebruik jul tegnologie tuis om aanlyn vir minderbevoorregte vriende en familielede ’n mediese dienssentrum naby hulle te vind en daardeur die las van mediese koste te verlig. Jy kan dalk aanbied om hulle maandeliks met jou kar kliniek toe te neem om medikasie te kry.
■ Jy kan ook jou rekenaar gebruik om hulle te help om ’n CV op te stel om aansoek te doen vir werk.
■ Nie almal weet watter staatstoelaes daar tot hul beskikking is en hoe om daarvoor aansoek te doen nie. Help hulle om die proses te ondersoek.
■ Danksy die covid-19-verligtingskemas bied vele instansies hulp aan soos maandelikse kospakkies of etes by dienssentrums. Dalk kan jy aanbied om hulle die eerste keer daarheen te neem.
■ Stel mense wat aan die huis vasgekluister is aan die dienste van die organisasie Meals On Wheels bekend. Dalk kan julle met ander bevoorregte vriende saamspan en ’n skenking maak. Skakel Meals On Wheels by 086-00-00-700.
■ As jy bewus is van enige probleme om skuld te delg, moedig so iemand aan om betyds vir skuldberading aan te klop.