ELDERS IN DIE WÊRELD

AMERIKA VOLGENDE STOP: VENUS!

Nasa het bekendgemaak hulle beplan vir tussen 2028 en 2030 twee ruimtesendings genaamd DAVINCI+ en VERITAS na Venus, die tweede planeet van die son af.

Die ruimteagentskap sê hulle wil daarmee graag meer leer oor die planeet se atmosfeer sowel as die struktuur en samestelling van sy oppervlak. “Die twee sustersendings is albei daarop gemik om te verstaan hoe Venus so warm geword het dat lood op die oppervlak kan smelt,” sê Bill Nelson, ’n Nasa-woordvoerder.

Dit sal die eerste keer in meer as drie dekades wees dat vaartuie na die warmste planeet in ons sonnestelsel gelanseer word.

KAMBODIA AFRIKA-BUIDELROT TREE UIT

Ná vyf jaar se diens het Magawa, ’n reuse-Afrika-buidelrot, sy soldaatstewels opgehang en uit sy gespesialiseerde pos as uitsnuffelaar in Kambodja uitgetree. Die knaagdier is opgelei om landmyne uit te snuffel in dié Oosterse land wat jare van gevegte en konflik ervaar het.

Baie ploftoestelle is nog onder die grond versteek, en rotte soos die sewejarige Magawa is ideaal om dit te identifiseer omdat hulle ’n verskriklik goeie reuksintuig het en lig genoeg is dat hulle nie die landmyne laat ontplof nie.

’n Liefdadigheidsorganisasie het onlangs ’n medalje gegee aan dié lewensreddertjie wat in sy dienstyd 71 landmyne opgespoor het.

CHINA TROP WILDE OLIFANTE SWERF 500 KM

’n Onlangse uitstappie van ’n trop van 15 olifante het China byna R14 miljoen uit die sak gejaag. Die groepie grootvoete het meer as 500 km oor die land afgelê en hul pad deur dorpe en boere se oeste oopgevreet en enorme skade aan ondernemings en plase aangerig. Hulle het veral ’n liefde vir alkoholen suikerprodukte, sê die inwoners.

Hierdie migrasie weg van hul habitat af verbaas die wetenskaplikes wat die diere se roete met hommeltuie dophou. Niemand is seker hoekom die olifante so ver van hul woonplek beweeg nie, maar party kenners vermoed dis dalk as gevolg van ontbossing – die uitkap of afsaag van bome.