SOET-SUUR VARKSKENKELBREDIE

Ons voeg varkpootjies en ’n gepiekelde varkskenkel – kenmerkend pienk van kleur wanneer dit gaar is – by om hierdie bredie lyf te gee.

GENOEG VIR 6-8 MENSE BEREIDING: 15 MIN. GAARMAAK: 1 UUR

1 kg varkpootjies, kleiner gesny indien nodig

1 x 250-300 g gepiekelde heel varkskenkel

1 ui, in kwarte gesny 2 lourierblare

BREDIE

15 ml (1 e) olie

1 ui, in wiggies gesny 5 cm-stuk gemmer, geskil en fyngekap

500 ml (2 k) brediebasis (sien resep bo) 350-400 g babawortels 60 ml (¼ k) elk witwynasyn en bruinsuiker

45 ml (3 e) sojasous sout (opsioneel)

1 Sit die varkpootjies en -skenkel in ’n drukkoker. Voeg die ui en lourierblare by en bedek met water. Seël die deksel goed en bring tot kookpunt. Laat kook 40-45 min. onder druk of tot die pootjies en skenkel sag is. Laat die stoom uit en dreineer die water.

2 Bredie Verhit die olie in ’n diep kastrol en braai die ui en gemmer tot geurig. Voeg die brediebasis, wortels, pootjies en skenkel by. Bring tot kookpunt, verlaag die hitte en laat prut 15 min. 3 Roer die asyn, suiker en sojasous by en geur met sout indien verkies.

4 Sit die bredie warm voor saam met ’n bykos van jou keuse.

As jy nie van varkpootjies hou nie, kan jy dit met varkpotjiekosvleis vervang. Pas net die kooktyd in die drukkoker aan indien nodig.