5 Minute met Lindsay Thys
Dié Kaapse aktrise het in 2019 vir die eerste keer in die sepie Suidooster ’n draai gemaak as die gemene Mercedes. Sy is nou terug op Ruiterbosch en sorg vir hope drama
1 Wat geniet jy van jou karakter in ‘Suidooster’?
Ek hou daarvan om ’n vrou te speel wat nie bang is om ’n sogenaamde mansport soos drag racing te oorheers nie, hoewel ander haar as vreemd beskou. Ek dink Mercedes is dapper, vreesloos en gaan vir dit wat sy wil hê. Ek geniet dit om ’n karakter met soveel selfvertroue te speel.
2 Beskryf jouself in drie woorde.
Flambojant, ontspanne, vreemd.
3 Noem drie dinge wat mense verbaas sal wees om van jou te weet.
■ As kind wou ek ’n veearts geword het, want ek hou van diere, maar ek het wiskunde en wetenskap op skool gehaat.
■ Spiritualiteit is ’n groot deel van my lewe. Ek probeer mediteer en in my joernaal skryf wanneer ek kan.
■ Ek is regtig skaam en moet nog gewoond raak daaraan om in die openbaar herken te word.
4 Jou gunsteling- plaaslike of internasionale akteur?
Die Amerikaanse aktrise Jennifer Lawrence. Ek was mal oor haar rol in die fliek Silver Linings Playbook saam met Bradley Cooper. Ek dink sy is ’n outentieke en natuurlike aktrise.
5 Watter raad sal jy aan jou tienerself gee?
Wees teenwoordig, geniet elke oomblik en moenie bang wees om jouself te wees nie – niemand is cooler as jy nie.