Neil Sandilands praat oor sy debuutalbum
Dié akteur en musikant se debuutalbum is eindelik hier
DIE DEBUUT
Aanhangers van Neil Sandilands as akteur was dadelik beïndruk toe sy liedjie “Breinskade” as deel van die dramareeks
Orion (2006) se klankbaan uitgereik is. Sedertdien het 7de Laan se geliefde Bart die een rol ná die ander losgeslaan, maar van sy talent as musikant was daar weinig oor die jare te sien. Tot nou, met die uitreiking van sy debuutalbum, Sangoma Sandilands & Jou Pa se Posse – Maanskyn.
Die album, wat ook op viniel beskikbaar is, bevat agt splinternuwe snitte en het twee David Kramer-liedjies waarvoor ’n nuwe baadjie aangetrek is. David sing selfs saam in “Piet soek vrou”.
“Al die liedjies op die album is verskillend. Die een klink nie soos die ander nie; hulle het verskillende tempo’s, rym en metrum,” vertel Neil.
Dié album met sy folk-, rock-, blues- en selfs riel-elemente is moontlik een van die belangrikste plaaslike albums wat vanjaar uitgereik sal word en is ’n wonderlike toevoeging tot Afrikaanse musiek in die geheel.
DIE LIEDJIESKRYFPROSES
Neil het in Julie verlede jaar die liedjie “Die ballade van Frik & Dot, oftewel, ‘Goue Graal’” uitgereik en was verbaas oor al die goeie reaksies wat hy op dié inperkingsprojek gekry het. “Die mense was so geweldig deur die ‘Goue Graal’ bekoor dat ek genoop was om te kyk na die karakters – ou Frik en Dot en Dipper – en die argetipiese waarde van God en die duiwel,” verduidelik Neil.
“Ek het rondom hierdie konstrukte ’n bietjie meer begin skryf, maar ek het nog glad nie aan ’n album gedink nie,” voeg hy by. Hiervoor het die legkaartstukke eers ’n bietjie later in plek begin pas.
Neil verskyn later vanjaar in die TVreeks Desert Rose as Freddy Fingers, wat hy as “die Johnny Cash van die Kalahari” beskryf.
“Vanuit ’n akteursperspektief wou ek reg laat geskied aan die rol, en ek wou vir Freddy sy eie oeuvre gee met sy eie stem,” sê Neil.
SAMEWERKINGS
In Januarie vanjaar het Neil en die musikant en vervaardiger Theo Crous aan die album begin werk. Talle talentvolle musikante, onder wie Schalk Joubert en Frazer Georgio Barry, is betrek om ’n klank te skep wat klink of Neil en sy troebadoertrawante sommer hier langs jou om ’n kampvuur sit en jolige musiek maak en stories vertel.
Instrumente soos die banjo, viool en ukelele word ingespan om te verseker dat die album “een voet in Afrika het, maar ook die invloed wys waaraan ek blootgestel is in my reise oorsee na onder meer New Orleans en Suid-Kalifornië”, sê Neil.
“Ek wou nie hê dit moet net eksklusief ’n Neil Sandilands-album wees nie, en ek wil dus krediet gee aan hierdie formidabele groep musikante saam met wie ek gewerk het.”
Dit is in dié gees dat daar tydens die opname van die album verskillende name vir hul groep bespreek is voor daar op “Sangoma Sandilands & Jou Pa se Posse” besluit is.
“Ek glo die ingesteldheid, pret en gees waarmee jy ’n album maak, bepaal hoeveel die luisteraar inkoop as jy die regte atmosfeer skep.”