DIE INSTITUUT WAAROOR DIE HERRIE WOED
Die Wuhan-instituut vir virologie in China doen navorsing oor virusse, onder meer coronavirusse.
Die instituut doen ook sogenaamde “gain of function”navorsing, sê kenners soos prof. Benoit Barbeau, ’n viroloog aan die Quebec-universiteit in Kanada.
“Die doel daarvan is om virusse te skep met nuwe eienskappe wat hulle meer patogenies of oordraagbaar na mense maak,” skryf hy op theconversation.com.
Wetenskaplikes reken as hulle kan vasstel hoe virusse ontwikkel, kan dit hulle help om die koms van nuwe pandemies beter te voorspel en beter daarop voorbereid te wees, verduidelik Benoit.
Party kundiges meen egter die gevare van dié soort navorsing weeg aansienlik swaarder as die voordele.
Van dié navorsing word daarom ook in party lande verbied.
Vrae word nou gestel oor die bioveiligheidsvlakke by die Wuhan-instituut. Sou dit moontlik wees vir ’n virus om uit die laboratorium te ontsnap? word gevra.
Prof. Shi Zhengli van die instituut het volgens die Bulletin
of the Atomic Scientists erken dat hul coronavirusnavorsing soms in laboratoriums met ’n graderingsvlak van 2 en 3 vir bioveiligheid gedoen is, terwyl die siening bestaan dat dit eerder in ’n maksimumveiligheidsomgewing, oftewel gradering 4, hoort.
Intussen het Anthony Fauci bevestig dat Amerika se National Institutes of Health vroeër finansiering beskikbaar gestel het vir wetenskaplike navorsing aan dié instituut, maar ontken dat die geld gebruik is vir enige “gain of function”-navorsing.