Die G7-beraad en wat dit vir ons beteken
DIE G7-beraad word elke jaar gehou. Dis ’n vergadering van die sewe leidende nywerheidslande: Amerika, Brittanje, Kanada, Frankryk, Duitsland, Italië en Japan.
Elkeen neem beurte om gasheer vir die beraad te speel. Verlede jaar sou dit in Amerika gewees het, maar dis weens die coronakrisis afgestel. Vanjaar is dit van 11 tot 13 Junie in Engeland op die kusdorpie Carbis Bay in Cornwall aangebied.
Op elke beraad bespreek die sewe leiers van die belangrikste kwessies waardeur mense reg oor die wêreld in die gesig gestaar word.
Vanjaar is covid-19-inentings, die klimaatskrisis en opvoeding vir meisies die hoogste op die agenda. Die leiers van Indië, Australië, SuidKorea en Suid-Afrika is ook genooi om die beraad as gaste by te woon. Pres. Cyril Ramaphosa het ook daar ’n draai gemaak.
Die leiers het, onder meer, belowe om met mekaar saam te werk om entstowwe te deel met ander nasies met die doelwit om die hele wêreld teen covid te beskerm.
Die klimaatskrisis is ook bespreek, veral om maniere te kry om armer lande te help om skadelike gasvrystellings te bekamp wat tot aardverhitting bydra. Die leiers het ook ooreengekom om in die volgende vyf jaar 40 miljoen meisies van minder gegoede lande te help om ’n skoolopvoeding te kry.
Die gasheer, Brittanje, het ’n 25-bladsye-dokument, in diplomatieke taal bekend as ’n communiqué, uitgereik wat opsom wat alles bereik is.
“Die besluite wat ons in dié dekade neem, veral die besluite wat die mees ontwikkelde lande neem, is die belangrikste besluite in die mensdom se geskiedenis,” het die vername omgewingsaktivis David Attenborough in ’n toespraak aan die leiers gesê.
Hoe het die G7-beraad ontstaan?
In die vroeë 1970’s het die ministers van finansies van Amerika, Frankryk, Duitsland en Brittanje informeel met mekaar begin kommunikeer oor allerhande kwessies wat eie was aan hul lande. Met soortgelyke ekonomiese ontwikkeling het hulle agtergekom hulle deel baie van dieselfde probleme. Later het Japan, Kanada en Italië bygekom. Die eerste amptelike beraad is in 1975 gehou. Rusland het in 1998 bygekom, wat dit toe die G8 gemaak het, maar hulle is weer in 2014 uitgeskop nadat hulle die Krim-skiereiland onregmatig beset het.
Het hulle enige mag?
Die groep leiers kan nie juis wette maak nie omdat hulle van verskillende lande kom met verskillende prosesse. Maar hul besluite het ’n globale invloed. In 2002 het hulle byvoorbeeld ’n wêreldwye fonds gestig om te help veg teen malaria en vigs; so het hulle ’n reusebydrae gelewer wat geld én bewustheid betref.