MENINGS OOR STORIES OP HUISGENOOT.COM
Neels van Jaarsveld en Florinda Hearn het mekaar in die eerste seisoen van Op my eish! gevind. Hul verhouding is verby, maar hul liefde bly staan
1 ‘DIS VERBY, MAAR ONS LIEFDE BLY’
Wanneer gaan mense leer? Hierdie verhoudings wat met programme begin werk 90% van die tyd nie uit nie. Dis nie die manier om jou lewensmaat te soek nie. Op die ou end staan albei met eier op hul gesig. BEULAH
Ek geniet hierdie programme sommer baie. Daar is maar altyd baie verhoudings in die wêreld wat nie uitwerk nie. Hoekom moet die mense nou altyd sleg praat hieroor? Ek is bly die twee is nog vriende. ELLA
Maak soos party nasies. Laat die ouer garde jou pasmaat soek. Dan trou julle, raak later lief vir mekaar en live happily ever after. Vandag se mense spring te gou in die kooi; dan is daar niks meer om na uit te sien nie. FEROZA
Ek stem nie saam met die kritiek nie. Eken my man het in ’n aanlyn geselsgroep ontmoet toe ek in Nederland was. Ons is getroud, het twee kinders en is die gelukkigste paartjie ooit. As dit werk dan werk dit. LINÉSE
2
Zephany Nurse verloof: ‘Ontvoerma welkom by my troue’
Jy is ’n pragtige dogter. Sy het jou met liefde grootgemaak, al was dit verkeerd wat sy gedoen het. Sy het dit net goed bedoel. Voorspoed op jou lewenspad, my kind, en wees lief vir albei jou ma’s, vir albei partye. ISABEL
Ek hoop regtigwaar Zephany sal nooit die hartseer beleef wat haar biologiese ouers moes deurmaak nie. Ek wens dit vir niemand toe nie. JULIAN
3
Tennislegende Boris Becker ‘sukkel’ in tronk
Jammer ons land het nie so ’n regstelsel nie. Hier steel een man ons land bankrot en wanneer hy voor die hof moet staan, gee hy voor hy is siek. Boris het die wet oortree, maar geregtigheid het sy gang gegaan. RICHARD
Jy bly in die verkeerde land, Boris. Jy moes hier by ons kom bly het, dan kon jy aanjaag nes jy wil. Hoe groter die geld betrokke, hoe beter. Jy kon dalk selfs ’n politieke pos losgeslaan het. Nou moet jy sit vir jou sondes. LANA