’N GEPASTE PLEK VIR ’N AFSKEID
Koningin Elizabeth II se afskeid is die eerste keer in 260 jaar dat Westminster Abbey ingespan word vir ’n staatshoof se begrafnis. Die vorige keer was vir koning George II in 1760.
Die koningin het self gevra dat sy van daar begrawe word. Westminster Abbey is waar twee van die grootste gebeurtenisse in haar lewe plaasgevind het: Sy en prins Philip is op 20 November 1947 daar getroud, en dis ook daar waar sy op 2 Junie 1953 gekroon is.
Die kerk is ook die plek waar sy haar wyle skoondogter, prinses Diana, in 1997, en haar ma, die koninginmoeder, in 2002, gegroet het. Dié twee vroue het albei seremoniële begrafnisse gekry – nes prins Philip – wat baie soos ’n staatsbegrafnis lyk, maar effens minder formeel is en nie met belastinggeld betaal word nie.
Konings en koninginne word gewoonlik in die St. George’skapel
in Windsor begrawe, maar die koningin wou haar diens in Westminster Abbey hê sodat soveel moontlik mense dit kon bywoon.
Die kapel het boonop plek vir net 800 mense, terwyl Westminster Abbey plek het vir 2 000.
“Sy wou hê dat die mense deel van haar dag kan wees,” sê ’n amptenaar van die koningshuis. “Sy het reg tot aan die einde aan die mense gedink.”