’N MODERNE MONARGIE
Koning Charles se belangrikste taak is volgens aanhangers om seker te maak die monargie het ’n toekoms. Hy beplan om ’n hele paar veranderings aan te bring om dié instelling meer aanpasbaar en lewenskragtig te maak.
Hy wil die naam verander van die medaljestelsel waarmee Britse presteerders vereer word. Tans staan dit as OBE (Order of the British Empire) bekend, maar Charles wil die woord Empire met Excellence verander omdat hy besef die huidige titel is ’n herinnering aan Brittanje se koloniale geskiedenis.
As koning word hy nou ook hoof van die Anglikaanse Kerk, en daarmee saam kry hy die amptelike titel “Defender of the Faith”. Charles wil graag die “the” uit die titel laat verwyder en net as “Defender of Faith” bekendstaan om vir mense aan te dui hy sal alle gelowe beskerm.
Die klimaatskrisis en boerdery bly vir hom belangrik. “Maar hy sal seker maak hy vermy omstredenheid terwyl hy probeer om ’n verskil te maak,” sê ’n bron.
Charles besef sy volk rou nog oor hul koningin, so hy sal nie oorhaastig beroerings veroorsaak nie. Hy weet stabiliteit en tradisie is belangrik – tot die publiek daaraan gewoond is om nie meer deur Elizabeth II regeer te word nie.