SJOKOLADE-fondantpoeding IN ’N POTJIE
GENOEG VIR 8 MENSE / BEREIDING: 15 MIN. / GAARMAAK: 25 MIN.
BESLAG
1 eier
75 ml (5 e) botter, gesmelt
125 ml (½ k) melk
12,5 ml (2½ t) vanieljegeursel
250 ml (1 k) bruismeel
25 ml (5 t) kakaopoeier
’n knypie sout
125 ml (½ k) suiker
160 g donkersjokolade, in blokkies gebreek
SOUS
375 ml (1½ k) bruinsuiker 50 ml (10 t) kakaopoeier
375 ml (1½ k) kookwater
VIR VOORSIT vars room of roomys
1 Beslag In jou no. 10-platboompotjie, klits die eier en gebruik jou houtlepel en meng die botter, melk en vanieljegeursel met die eier.
2 Voeg die meel, kakao, sout, suiker en sjokoladestukke by die beslag van stap 1. Gebruik net die suiker en kakao wat vir die beslag bedoel is, nie die sous se suiker en kakao nie – dit kom eers by die volgende stap. Alles moet deeglik meng; vat dus ’n houtlepel en gee jou arm werk. As jy onfiks is, kul een van jou vriende of familielede om jou te help, of koop ’n staafmenger (dit het my lewe verander).
3 Sous Meng die suiker, kakao en kookwater tot die suiker opgelos het en die mengsel glad is. Giet die warm sous oor die beslag wat reeds in die pot is. Moenie roer nie; giet dit net oor.
4 Sit die potjie se deksel op en bak 25 min. deur kole onder die pot te pak en ’n klompie kole op die deksel. Jou kunswerk is gereed wanneer die bokant van die poeding ferm onder jou vingers voel.
5 Vir voorsit Sit voor saam met vars room of roomys.