WAAROOR MOET EK EN MY MAAT GESELS?

Daryl Coker, ’n finansiële raadgewer by Citadel, sê dit is belangrik dat julle met mekaar oor die volgende praat: Loopbaan- en familiedoelwitte

Kinders is duur en het baie sorg nodig. Julle sal moet besluit wie die primêre broodwinner gaan wees en wie meer tyd aan die kinders gaan afstaan. (Let wel: Die broodwinner hoef nie altyd die man te wees nie.)

As julle besluit net een party in die huwelik gaan werk en die ander gaan die tuisteskepper wees, moet julle versigtig wees. “Dan moet julle gesels oor ’n gedeelde bankrekening vir huishoudelike uitgawes – die tuisteskepper kan hierdie geld gebruik vir wat hulle nodig het,” beveel Naomi Suzane, ’n sielkundige van Kaapstad, aan. “Wanneer die persoon wat nie werk nie die broodwinner heeltyd geld moet vra, kan dit tot verwyte lei.” Gesamentlike langtermyndoelwitte

Dis ’n goeie idee vir paartjies wat op langtermyn finansieel stabiel wil wees om saam te besluit watter beleggings hulle wil maak en watter spaarplanne hulle wil hê. Daryl sê dit kan slim wees om saam ’n finansiële raadgewer te sien om julle met dié planne te help.