BABA NO. 4 VIR BLAKE

BLAKE LIVELY het haar vierde swangerskap vroeër vandeesmaand aangekondig op ’n indrukwekkende manier wat niemand kon miskyk nie.

Pleks van ’n amptelike aankondiging op sosiale media of in ’n onderhoud, het die wêreld uitgevind Blake (35) en Ryan Reynolds (45) se vierde kind is op pad toe die aktrise by die Forbes Power Women’s Summit in ’n nousluitende Valentino-minirok opgedaag het en met haar bababoepie op die rooitapyt vir foto’s poseer het. Sy het haar uitrusting afgerond met hemelhoë hakskoene, ook deur Valentino.

Blake het in ’n gesprek by die geleentheid gepraat oor haar ervaring as kunstenaar en sakevrou.

“Ek hou van skep. Of dit nou fyngebak, stories, ondernemings of mense is. Ek hou baie daarvan om dinge te skep.”

Blake het reeds drie dogters, James (7), Inez (5) en Betty (2). Ons kyk terug na die vorige kere toe sy swanger op die rooitapyt verskyn het.

‘Ek hou van skep. Of dit nou fyngebak, stories, ondernemings of mense is. Ek hou baie daarvan om dinge te skep’ – BLAKE LIVELY

2014 Blake het haar swangerdebuut gemaak by die Golden Heart Awards. 2016 Sy het haar tweede swangerskap ’n bietjie weggesteek by die Met Gala in ’n rok van Burberry. 2019 Met Ryan en Blake se derde kind het hulle die koppe laat draai by die premiere van Pokémon Detective Pikachu.

Blake is onlangs gesien saam met haar drie dogters Betty, Inez en James.