’N SEDIGE SEREMONIE
Ook wat die inhoud van die diens betref, is die koningin se wense gerespekteer. Sy is voor haar dood gevra watter musiek sy graag daar gespeel sou wou hê, en dis toe so uitgevoer.
Benewens drie gesange wat sy aangevra het, het die Skotse komponis James MacMillan en die koningin se amptelike musiekmeester, Judith Weir, twee nuwe werke vir die begrafnis gekomponeer.
Die eerste gesang, “The Day
Thou Gavest Lord Is Ended”, is gekies om gesing te word nadat dr. David Hoyle, die dekaan van Westminster, die openingsgebed gedoen het. “The Lord’s My Shepherd” is gekies omdat dit een van die koningin se gunstelinge was – dis ook op haar troue gesing.
En toe is “Love Divine, All Loves Excelling” gekies om gesing te word nadat die Onse Vader voorgelees is.
Nog musiekkeuses sluit in
“The Last Post”, wat tradisioneel op militêre begrafnisse deur trompette gespeel word, en “Reveille”, ’n seremoniële stuk om die twee minute gewyde stilte te volg.
“Sleep, Dearie, Sleep” is gekies om deur ’n doedelsakspeler van die Skotse regiment– dieselfde man wat haar elke oggend met sy instrument wakker gemaak het – gespeel te word terwyl die kis en die prosessie die kerk verlaat.