GROOTKOPPE BYEEN
Sowat 500 staatshoofde, buitelandse hoogwaardigheidsbekleërs en lede van Europese koningshuise is na die begrafnis genooi. Ongelukkig vir dié wat gehoop het dit sou op ’n luukse reis uitloop, is hulle almal gevra om met gewone kommersiële vlugte na Londen te reis eerder as met privaat stralers. Londen se lughawens sou nie plek hê vir al dié privaat vliegtuie nie, is hulle gemaan.
Die sekuriteitsreëlings vir al dié hoëlui was intens, met skerpskutters wat op die dakke van Sentraal-Londen gestasioneer is om ’n wakende oog te hou. Sowat 10 000 polisiebeamptes was aan diens om enige moeilikheid in die kiem te smoor.
Belangrike besoekers is deur hul bestuurders by ’n geheime ligging in die weste van Londen afgelaai, van waar hulle met busse van die Britse regering na Westminster Abbey vervoer is.
Die enigste wêreldleier wat dié busrit vrygespring het, was Amerika se pres. Joe Biden en sy vrou, Jill. Hulle het spesiale toestemming gekry om met hul gepantserde limousine, bekend as The Beast, tot by die kerk te ry. In ’n stadium het hulle in die moordende Britse verkeer vasgesit, maar hulle het darem betyds vir die diens by die kerk opgedaag.
Bloubloedgaste het ingesluit bekende gesigte soos Jordanië se koningin Raina al-Abdoellah, Spanje se koning Felipe VI en koningin Letizia, en Swede se koning Carl XVI Gustaf en koningin Silva; maar ook ander koninklikes van wie ’n mens nie aldag lees nie, soos Bhoetan se koning Jigme Khesar en koningin Jetsun Pema, en Lesotho se koning Letsie III.
Suid-Afrika is deur sowel pres. Cyril Ramaphosa as Naledi Pandor, die minister van internasionale aangeleenthede, verteenwoordig. Dan was daar ook Frankryk se pres. Emmanuel Macron, die Nieu-Seelandse premier, Jacinda Arden, Brasilië se pres. Jair Bolsonaro, Kanada se premier, Justin Trudeau, en China se visepres. Wang Qishan.
Alle lewende voormalige Britse premiers was daar, insluitend Boris Johnson, wat net ’n paar weke gelede sy pos ontruim het.
Om vir al dié hoogwaardigheidsbekleërs blyplek te reël, kon geen maklike taak gewees het nie. Die Amerikaanse presidentspaar het glo in Winfield House in Regent’s Park, die ampswoning van die Amerikaanse ambassadeur in Brittanje, gebly. Lede van ander koningshuise het meestal in Buckinghampaleis gebly. Maar hoe verlate moes dié legendariese tuiste nie sonder sy beroemdste inwoner gevoel het nie . . .