MARGIT MEYER-RÖDENBECK
LUCA (13), dogter van Margit en haar man, JURG HUMAN, se eerste groot kennismaking met die verhoog was toe sy in 2015 Mattewis in haar ma se pantomime Liewe Heksie: Flower Power gespeel het. Sedertdien was Luca al te sien in die kortfliek Die maan val bewusteloos en in skoolkonserte, en doen sy ook oorklankingswerk. “Sy is baie op die verhoog en dit lyk vir my dit voel vir haar soos ’n veilige ruimte. Sy sing en speel kitaar en klavier. Toneelspel is beslis haar uitlaatklep,” sê Margit. Luca het ook onlangs ’n rits pryse op die Tygerberg Internasionale Eisteddfod ontvang. “As ek haar dophou, hoe sy haar kreatiwiteit uitleef, dan is ek in bewondering, en soms vergeet ek sy is my kind. Dan sien ek haar net as ’n medekunstenaar, en dis seker die grootste kompliment wat ek my eie kind kan gee. Terselfdertyd moet ek sê ek weet nie of ek altyd wil hê sy moet in my voetspore volg nie. Dis ’n moeilike bedryf.”